भारत ए ले त्रिकोणीय एकदिवसीय शृंखलाको पहिलो खेलमा श्रीलंका ए लाई ८ रनले पराजित गर्दै विजयी सुरुआत गरेको छ। कप्तान ऋतुराज गायकवाडको शतकीय इनिङ्स र बलरहरूको दबाबपूर्ण प्रदर्शनको मद्दतमा भारत ए ले अन्तिम क्षणमा खेल आफ्नो पक्षमा पार्न सफल भयो।
टस जितेर पहिले ब्याटिङ गरेको भारत ए ले ५० ओभरमा ६ विकेट गुमाएर २७७ रन बनायो। टोलीको सुरुआत अपेक्षाअनुसार हुन नसके पनि कप्तान ऋतुराज गायकवाडले जिम्मेवारीपूर्ण शतकीय इनिङ्स खेले। उनले ११४ बलमा १०१ रन बनाए, जसमा ६ चौका र ३ छक्का समावेश थिए। यस क्रममा उनले आफ्नो २१औँ लिस्ट-ए शतक पूरा गरे।
भारत ए को इनिङ्सलाई मजबुत बनाउन तिलक वर्माले पनि महत्वपूर्ण योगदान दिए। ऋतुराज र तिलकबीच तेस्रो विकेटका लागि १५० रनको साझेदारी भयो। तिलक वर्माले ९७ बलमा ६० रन बनाए। यसबाहेक प्रियांश आर्याले ३२, आयुष बदोनीले २४ तथा सूर्यांश शेडगेले अविजित २६ रनको योगदान दिए।
अन्तिम ओभरहरूमा तीव्र गतिमा रन जोड्दै भारत ए ले २७७ रनको प्रतिस्पर्धात्मक स्कोर खडा गर्यो। श्रीलंका ए का तर्फबाट मोहम्मद शिराजले २ विकेट लिए भने चमिका करुणारत्ने, गारुका संकेथ र वानुजा सहनले १–१ विकेट लिए।
२७८ रनको लक्ष्य पछ्याएको श्रीलंका ए ले उत्कृष्ट सुरुआत गर्यो। निरोशन डिकवेला र अविष्का फर्नान्डोले पहिलो विकेटका लागि ९३ रनको साझेदारी गर्दै भारतीय बलरमाथि दबाब बनाए। त्यसपछि आयुष बदोनीले लगातार दुई विकेट लिए। उनले अविष्का फर्नान्डोलाई ४५ रनमा र त्यसपछि डिकवेलालाई ४७ रनमा आउट गरे। त्यसपछि विपराज निगमले नुवानिदु फर्नान्डोलाई आउट गरे।
सुरुआती झट्कापछि श्रीलंका ए का कप्तान सहान अराचिगे र सदीरा समरविक्रमाले इनिङ्स सम्हाले। दुवैबीच चौथो विकेटका लागि ७८ रनको साझेदारी भयो। समरविक्रमाले ४६ रन बनाए भने अराचिगेले ७२ बलमा ७४ रनको इनिङ्स खेले, जसमा ६ चौका र २ छक्का समावेश थिए।
अराचिगे आउट हुँदासम्म श्रीलंका ए को स्कोर ७ विकेटमा २६२ रन थियो र टोली जिततर्फ अघि बढिरहेको देखिन्थ्यो। तर अन्तिम चरणमा भारतीय बलरहरूले दबाब सिर्जना गर्दै लगातार विकेट लिए। श्रीलंका ए ले मात्र ७ रनको अन्तरमा आफ्ना अन्तिम ४ विकेट गुमायो र सम्पूर्ण टोली ४८.५ ओभरमा २६९ रनमा समेटियो।
भारत ए का लागि अरशद खान, आयुष बदोनी, अनुकूल रोय र विपराज निगमले समान २–२ विकेट लिए भने अंशुल कम्बोजले महत्वपूर्ण समयमा १ विकेट लिए।
