सिलिगुडीमा नवौं कक्षाकी एक छात्रीको रहस्यमय मृत्युको घटना थप रहस्यमय बन्दै गएको छ। उत्तरकन्यासँग जोडिएको जङ्गलबाट ती छात्रीको शव फेला परेपछि अब नयाँ चाञ्चल्यपूर्ण तथ्य सार्वजनिक भएको छ। मृत छात्रीको जुत्ता उनको एक घनिष्ठ साथीको घरमा भेटिएको छ। यति मात्र होइन, त्यो घरबाटै बियरको बोतल पनि फेला परेको छ। यो नयाँ तथ्यले अनुसन्धानमा नयाँ मोड ल्याएको छ।
प्रहरीको अनुमान छ, घटनाको सुरुवात त्यही साथीको घरबाट भएको हुनसक्छ। किनभने, जहाँबाट शव फेला परेको छ, त्यो साथीको घरबाट धेरै टाढा छैन। फलतः छात्री त्यहाँ कसरी पुगिन्, मृत्युअघि उनी कहाँ थिइन्—यी सबै प्रश्नको उत्तर खोजिरहेको छ प्रहरीले।
अन्तिम क्षणमा के भयो?
परिवारको दाबी छ, मङ्गलवार दिउँसो घरबाट निस्केकी ती छात्रीले दुई साथी र एक साथीनीसँग बिर्यानी खाने बताएकी थिइन्। बाटोमा आफ्नी फुपूसँग भेट भए पनि उनी घर फर्केकी थिइनन्। बेलुका भइसक्दा पनि सम्पर्क नभएपछि परिवार चिन्तित हुन थालेका थिए।
केही समयपछि छात्रीकी एक साथीले फोन गरेर जङ्गलबाट उनको शव फेला परेको जानकारी दिइन्। ती साथीहरूले नै शव अस्पताल पुर्याएका थिए जहाँ चिकित्सकले उनलाई मृत घोषित गरेका थिए।
परिवारको गम्भीर आरोप
मृत छात्रीको परिवारको आरोप छ, उनको अपहरण गरी बलात्कारपछि हत्या गरिएको छ। छात्रीको शरीरमा चोटका चिह्न, खरोंचका दाग र घाँटीमा कालो दाग भेटिएको परिवारको दाबी छ। यो घटनामा एनजेपी प्रहरी चौकीमा मुद्दा दर्ता भएको छ।
अनुसन्धानमा प्रहरी, सोधपुछ जारी
घटनालगत्तै प्रहरीले अनुसन्धान सुरु गरेको छ। छात्रीका दुई साथी र एक साथीनीलाई पक्राउ गरी सोधपुछ भइरहेको छ। शव परीक्षणका लागि पठाइएको छ। परीक्षण रिपोर्ट आएपछि मृत्युको वास्तविक कारण थाहा हुने प्रहरीले बताएको छ।
प्रश्न उठेको छ, छात्रीको मृत्यु पछाडि कुनै योजनाबद्ध षड्यन्त्र छ कि छैन। साथीको घरबाट उनको जुत्ता र बियरको बोतल फेला पर्नु—यी दुई महत्वपूर्ण सुरागले अनुसन्धानकर्ताहरू सामु नयाँ प्रश्न खडा गरेको छ। प्रहरी अब त्यो घरमा के भयो र छात्रीको अन्तिम क्षणको अवस्थाबारे थप जानकारी संकलन गर्ने प्रयास गरिरहेको छ।
