थलपति विजयको अन्तिम फिल्म ‘जन नायकन’ को प्रदर्शन मितिलाई लिएर अनिश्चितता कायमै रहेको छ। केन्द्रीय फिल्म प्रमाणिकरण बोर्डबाट सेन्सर प्रमाणपत्र नपाउँदा यो फिल्म पहिले पोंगलको अवसरमा ९ जनवरीमा रिलिज हुने तय भए पनि स्थगित हुन पुगेको थियो। कानुनी प्रक्रिया र सेन्सर बोर्डसँग सम्बन्धित विवादका कारण फिल्मको प्रदर्शन अझै टुंगोमा पुगेको छैन।
रिलिजमा आएको अवरोधपछि निर्माता पक्षले मद्रास उच्च अदालतमा याचिका दायर गरेका थिए। यस मामलामा एकल न्यायाधीश पी.टी. आशाले सेन्सर बोर्डलाई फिल्मलाई ‘U/A’ प्रमाणपत्र दिन निर्देशन दिएका थिए। तर सेन्सर बोर्डले उक्त आदेशविरुद्ध अपील दायर गर्दै अन्तरिम रोक लगाइयो र सुनुवाइ स्थगित गरियो। पछि यो विषय सर्वोच्च अदालतसम्म पुगे पनि अदालतले सुनुवाइ गर्न अस्वीकार गर्दै पुनः उच्च अदालतमै जान निर्देशन दिएको थियो।
यसपछि मद्रास उच्च अदालतले अघिल्लो आदेश रद्द गर्दै नयाँ सुनुवाइ गर्न आदेश दिएको छ। अब यो मामलाको पुनः सुनुवाइ एकल न्यायाधीशमार्फत गरिनेछ। यस प्रक्रियाले फिल्मको रिलिज थप महिनौं ढिलाइ हुन सक्ने आशंका बढेपछि निर्माता पक्षले अदालतमा दायर गरिएको मुद्दा फिर्ता लिने निर्णय गरेको बताइएको छ।
‘जन नायकन’ को निर्देशन एच. विनोदले गरेका हुन् भने निर्माण केभीएन प्रोडक्सन्सले गरेको हो। सेन्सर बोर्डले फिल्मका केही दृश्यहरूलाई सेनाको छवि र धार्मिक भावनासँग सम्बन्धित संवेदनशील विषयसँग जोडिएको भन्दै आपत्ति जनाएको थियो। प्रारम्भिक परीक्षण समितिले केही दृश्य काटिएपछि ‘U/A’ प्रमाणपत्र दिन सिफारिस गरेको भए पनि बोर्डका अध्यक्ष प्रसून जोशीले फिल्मलाई पुनरावलोकन समितिमा पठाएका थिए।
पुनरावलोकन समितिका एक सदस्यले फिल्मविरुद्ध औपचारिक उजुरी दर्ता गरेपछि विवाद थप जटिल बनेको थियो। यसका कारण फिल्मको प्रदर्शन पटक–पटक स्थगित हुँदै आएको छ।
सेन्सर प्रमाणपत्र बिना ‘जन नायकन’ लाई सिनेमाघरमा प्रदर्शन गर्न सम्भव नभएकाले निर्माता पक्षले अब दुई सम्भावित विकल्पमाथि विचार गरिरहेको बताइएको छ। पहिलो, सेन्सर बोर्डसँग पुनः परीक्षण प्रक्रिया पूरा गर्ने र दोस्रो, अदालतको बाटो छोडेर फिल्मलाई ओटीटी प्लेटफर्ममार्फत सार्वजनिक गर्ने। यसअघि पनि केही फिल्महरू सेन्सर विवादका कारण सिनेमाघरमा प्रदर्शन हुन नसकी ओटीटी प्लेटफर्म वा संशोधित संस्करणमार्फत रिलिज गरिएका उदाहरण रहेका छन्।
