ਪੰਜਾਬ ਨੇ ਸ੍ਰੇਯਸ ਅਈਅਰ ਦੀ ਸ਼ਾਨਦਾਰ ਅਰਧ ਸੈਂਕੜੇ ਦੀ ਬਦੌਲਤ ਨਿਰਧਾਰਤ 20 ਓਵਰਾਂ ਵਿੱਚ ਛੇ ਵਿਕਟਾਂ ਗੁਆ ਕੇ 206 ਦੌੜਾਂ ਬਣਾਈਆਂ। ਜਵਾਬ ਵਿੱਚ ਦਿੱਲੀ ਦੀ ਟੀਮ ਨੇ ਬੇਹਤਰੀਨ ਬੱਲੇਬਾਜ਼ੀ ਕਰਦੇ ਹੋਏ 19.3 ਓਵਰਾਂ ਵਿੱਚ ਚਾਰ ਵਿਕਟਾਂ ਗੁਆ ਕੇ 208 ਦੌੜਾਂ ਬਣਾ ਲਈਆਂ ਅਤੇ ਮੁਕਾਬਲਾ ਛੇ ਵਿਕਟਾਂ ਨਾਲ ਆਪਣੇ ਨਾਮ ਕੀਤਾ।
ਖੇਡ ਸਮਾਚਾਰ: ਜੈਪੁਰ ਦੇ ਸਵਾਈ ਮਾਨ ਸਿੰਘ ਸਟੇਡੀਅਮ ਵਿੱਚ ਸ਼ਨਿਚਰਵਾਰ ਨੂੰ ਖੇਡੇ ਗਏ ਇੱਕ ਬਹੁਤ ਹੀ ਰੋਮਾਂਚਕ ਮੁਕਾਬਲੇ ਵਿੱਚ ਦਿੱਲੀ ਕੈਪੀਟਲਸ ਨੇ ਪੰਜਾਬ ਕਿਂਗਜ਼ ਨੂੰ ਛੇ ਵਿਕਟਾਂ ਨਾਲ ਹਰਾ ਕੇ ਮੌਜੂਦਾ ਸੈਸ਼ਨ ਦਾ ਆਪਣਾ ਅਭਿਆਨ ਜਿੱਤ ਨਾਲ ਖਤਮ ਕੀਤਾ। ਦਿੱਲੀ ਲਈ ਸਮੀਰ ਰਿਜ਼ਵੀ ਨੇ ਸ਼ਾਨਦਾਰ ਨਾਬਾਦ ਅਰਧ ਸੈਂਕੜਾ ਜਮਾਇਆ ਜਦੋਂ ਕਿ ਕਰੁਣ ਨਾਇਰ ਅਤੇ ਟ੍ਰਿਸਟਨ ਸਟੱਬਸ ਨੇ ਵੀ ਅਹਿਮ ਯੋਗਦਾਨ ਪਾਇਆ। ਇਸ ਹਾਰ ਨਾਲ ਪੰਜਾਬ ਦੀ ਟੌਪ-2 ਵਿੱਚ ਜਗ੍ਹਾ ਬਣਾਉਣ ਦੀਆਂ ਉਮੀਦਾਂ ਨੂੰ ਵੱਡਾ ਝਟਕਾ ਲੱਗਾ ਹੈ।
ਪੰਜਾਬ ਦੀ ਵਿਸਫੋਟਕ ਸ਼ੁਰੂਆਤ
ਟੌਸ ਹਾਰ ਕੇ ਪਹਿਲਾਂ ਬੱਲੇਬਾਜ਼ੀ ਕਰਦੇ ਹੋਏ ਪੰਜਾਬ ਕਿਂਗਜ਼ ਨੇ 20 ਓਵਰਾਂ ਵਿੱਚ ਛੇ ਵਿਕਟਾਂ 'ਤੇ 206 ਦੌੜਾਂ ਬਣਾਈਆਂ। ਟੀਮ ਦੀ ਸ਼ੁਰੂਆਤ ਧਮਾਕੇਦਾਰ ਰਹੀ। ਹਾਲਾਂਕਿ, ਸ਼ੁਰੂਆਤੀ ਵਿਕਟ ਜਲਦੀ ਹੀ ਡਿੱਗ ਗਏ ਪਰ ਮਿਡਲ ਆਰਡਰ ਨੇ ਪਾਰੀ ਨੂੰ ਸੰਭਾਲਿਆ। ਸ੍ਰੇਯਸ ਅਈਅਰ ਨੇ 34 ਗੇਂਦਾਂ ਵਿੱਚ 53 ਦੌੜਾਂ ਦੀ ਤੇਜ਼ ਪਾਰੀ ਖੇਡੀ, ਜਿਸ ਵਿੱਚ ਪੰਜ ਚੌਕੇ ਅਤੇ ਦੋ ਛੱਕੇ ਸ਼ਾਮਲ ਸਨ। ਇਸੇ ਤਰ੍ਹਾਂ, ਮਾਰਕਸ ਸਟੋਇਨਿਸ ਨੇ ਚਾਰ ਛੱਕੇ ਅਤੇ ਤਿੰਨ ਚੌਕਿਆਂ ਦੀ ਮਦਦ ਨਾਲ ਤੇਜ਼ੀ ਨਾਲ ਦੌੜਾਂ ਜੋੜੀਆਂ ਅਤੇ ਪੰਜਾਬ ਨੂੰ 200 ਦੇ ਪਾਰ ਪਹੁੰਚਾਇਆ।
ਦਿੱਲੀ ਦੇ ਗੇਂਦਬਾਜ਼ਾਂ ਵਿੱਚ ਮੁਸਤਫ਼ਿਜ਼ੁਰ ਰਹਿਮਾਨ ਸਭ ਤੋਂ ਪ੍ਰਭਾਵਸ਼ਾਲੀ ਰਹੇ, ਜਿਨ੍ਹਾਂ ਨੇ ਦੋ ਵਿਕਟਾਂ ਲਈਆਂ। ਵਿਰਾਜ ਨਿਗਮ ਨੇ ਵੀ ਕਿਫਾਇਤੀ ਗੇਂਦਬਾਜ਼ੀ ਕਰਦੇ ਹੋਏ ਇੱਕ ਵਿਕਟ ਲਿਆ ਅਤੇ ਵਿਰੋਧੀ ਬੱਲੇਬਾਜ਼ਾਂ ਨੂੰ ਖੁੱਲ੍ਹ ਕੇ ਖੇਡਣ ਨਹੀਂ ਦਿੱਤਾ। ਕੁਲਦੀਪ ਯਾਦਵ ਨੂੰ ਵੀ ਇੱਕ ਸਫਲਤਾ ਮਿਲੀ।
ਰਿਜ਼ਵੀ-ਨਾਇਰ ਦੀ ਭਾਈਵਾਲੀ ਨੇ ਦਿਵਾਈ ਜਿੱਤ ਦਾ ਰਾਹ
207 ਦੌੜਾਂ ਦੇ ਟੀਚੇ ਦਾ ਪਿੱਛਾ ਕਰਨ ਉਤਰੀ ਦਿੱਲੀ ਦੀ ਸ਼ੁਰੂਆਤ ਚੰਗੀ ਰਹੀ। ਕੇ. ਐੱਲ. ਰਾਹੁਲ ਅਤੇ ਫਾਫ ਡੂ ਪਲੇਸਿਸ ਨੇ ਪਹਿਲੇ ਵਿਕਟ ਲਈ 55 ਦੌੜਾਂ ਜੋੜੀਆਂ। ਰਾਹੁਲ ਨੇ 21 ਗੇਂਦਾਂ ਵਿੱਚ 35 ਦੌੜਾਂ ਬਣਾਈਆਂ ਜਦੋਂ ਕਿ ਡੂ ਪਲੇਸਿਸ ਨੇ 23 ਦੌੜਾਂ ਦਾ ਯੋਗਦਾਨ ਪਾਇਆ। ਇਸ ਤੋਂ ਬਾਅਦ ਸਿੱਦੀਕੁੱਲਾਹ ਅਟਲ 22 ਦੌੜਾਂ ਬਣਾ ਕੇ ਆਊਟ ਹੋ ਗਏ। ਦਿੱਲੀ ਦੀ ਜਿੱਤ ਦੀ ਅਸਲੀ ਨੀਂਹ ਰੱਖੀ ਕਰੁਣ ਨਾਇਰ ਅਤੇ ਸਮੀਰ ਰਿਜ਼ਵੀ ਦੀ ਜੋੜੀ ਨੇ। ਦੋਨਾਂ ਨੇ ਮਿਲ ਕੇ ਚੌਥੇ ਵਿਕਟ ਲਈ 30 ਗੇਂਦਾਂ ਵਿੱਚ 62 ਦੌੜਾਂ ਜੋੜੀਆਂ।
ਕਰੁਣ ਨਾਇਰ 44 ਦੌੜਾਂ ਬਣਾ ਕੇ ਆਊਟ ਹੋ ਗਏ, ਪਰ ਸਮੀਰ ਰਿਜ਼ਵੀ ਨੇ ਕ੍ਰੀਜ਼ 'ਤੇ ਟਿਕੇ ਰਹਿ ਕੇ ਜਿੱਤ ਯਕੀਨੀ ਕੀਤੀ। ਅੰਤ ਵਿੱਚ ਟ੍ਰਿਸਟਨ ਸਟੱਬਸ ਅਤੇ ਰਿਜ਼ਵੀ ਨੇ ਨਾਬਾਦ 53 ਦੌੜਾਂ ਦੀ ਭਾਈਵਾਲੀ ਕਰਕੇ ਦਿੱਲੀ ਨੂੰ 19.3 ਓਵਰਾਂ ਵਿੱਚ ਜਿੱਤ ਦਿਵਾਈ। ਰਿਜ਼ਵੀ ਨੇ 58 ਦੌੜਾਂ ਦੀ ਨਾਬਾਦ ਪਾਰੀ ਖੇਡੀ ਜਦੋਂ ਕਿ ਸਟੱਬਸ 18 ਦੌੜਾਂ ਬਣਾ ਕੇ ਨਾਟ ਆਊਟ ਰਹੇ।
ਪੰਜਾਬ ਦੇ ਗੇਂਦਬਾਜ਼ਾਂ ਦਾ ਫ਼ਿੱਕਾ ਪ੍ਰਦਰਸ਼ਨ
ਪੰਜਾਬ ਦੇ ਗੇਂਦਬਾਜ਼ ਇਸ ਮੁਕਾਬਲੇ ਵਿੱਚ ਪ੍ਰਭਾਵ ਨਹੀਂ ਛੱਡ ਸਕੇ। ਹਰਪ੍ਰੀਤ ਬਰਾੜ ਨੇ ਦੋ ਵਿਕਟਾਂ ਜ਼ਰੂਰ ਲਈਆਂ, ਪਰ ਬਾਕੀ ਗੇਂਦਬਾਜ਼ ਕਾਫ਼ੀ ਮਹਿੰਗੇ ਸਾਬਤ ਹੋਏ। ਮਾਰਕੋ ਯਾਨਸਨ ਅਤੇ ਪ੍ਰਵੀਨ ਦੁਬੇ ਨੂੰ ਇੱਕ-ਇੱਕ ਵਿਕਟ ਮਿਲੀ, ਪਰ ਦੌੜਾਂ ਰੋਕਣ ਵਿੱਚ ਉਹ ਅਸਫਲ ਰਹੇ। ਖਾਸ ਕਰਕੇ ਡੈੱਥ ਓਵਰਾਂ ਵਿੱਚ ਪੰਜਾਬ ਦੀ ਗੇਂਦਬਾਜ਼ੀ ਬਹੁਤ ਕਮਜ਼ੋਰ ਦਿਖਾਈ ਦਿੱਤੀ, ਜਿਸ ਦਾ ਫਾਇਦਾ ਦਿੱਲੀ ਦੇ ਬੱਲੇਬਾਜ਼ਾਂ ਨੇ ਜਮ ਕੇ ਉਠਾਇਆ।
ਇਸ ਜਿੱਤ ਤੋਂ ਬਾਅਦ ਦਿੱਲੀ ਕੈਪੀਟਲਸ ਨੇ ਪੁਆਇੰਟਸ ਟੇਬਲ ਵਿੱਚ ਪੰਜਵੇਂ ਸਥਾਨ 'ਤੇ ਰਹਿੰਦੇ ਹੋਏ ਆਪਣਾ ਅਭਿਆਨ ਖਤਮ ਕੀਤਾ। ਹਾਲਾਂਕਿ, ਇਹ ਜਿੱਤ ਪਲੇਆਫ਼ ਵਿੱਚ ਉਨ੍ਹਾਂ ਦੀ ਐਂਟਰੀ ਯਕੀਨੀ ਨਹੀਂ ਕਰ ਸਕੀ। ਇਸੇ ਤਰ੍ਹਾਂ, ਪੰਜਾਬ ਕਿਂਗਜ਼ ਦੀ ਟੌਪ-2 ਵਿੱਚ ਪਹੁੰਚਣ ਦੀਆਂ ਉਮੀਦਾਂ ਨੂੰ ਕਰਾਰਾ ਝਟਕਾ ਲੱਗਾ ਹੈ। ਟੀਮ ਹੁਣ 13 ਮੈਚਾਂ ਵਿੱਚ 8 ਜਿੱਤਾਂ ਨਾਲ 17 ਅੰਕਾਂ 'ਤੇ ਬਣੀ ਹੋਈ ਹੈ ਅਤੇ ਆਖਰੀ ਲੀਗ ਮੈਚ ਵਿੱਚ ਉਸਨੂੰ ਮੁੰਬਈ ਇੰਡੀਅਨਜ਼ ਨਾਲ ਭਿੜਣਾ ਹੈ।
