ਭਾਰਤ ਅਤੇ ਸੰਯੁਕਤ ਰਾਜ ਅਮਰੀਕਾ ਦਰਮਿਆਨ ਵਪਾਰ ਸਮਝੌਤਾ ਅੰਤਿਮ ਹੋਣ ਤੋਂ ਬਾਅਦ ਭਾਰਤੀ ਸ਼ੇਅਰ ਬਾਜ਼ਾਰ ਵਿੱਚ ਤੇਜ਼ ਹਲਚਲ ਦਰਜ ਕੀਤੀ ਗਈ। ਇਸ ਸਮਝੌਤੇ ਦਾ ਪ੍ਰਭਾਵ ਉਰਜਾ, ਪੋਰਟਸ ਅਤੇ ਲੋਜਿਸਟਿਕਸ ਨਾਲ ਜੁੜੀਆਂ ਕੰਪਨੀਆਂ ’ਤੇ ਸਿੱਧਾ ਪਿਆ। ਇਨ੍ਹਾਂ ਖੇਤਰਾਂ ਵਿੱਚ ਸਰਗਰਮ ਅਦਾਣੀ ਗਰੁੱਪ ਦੀਆਂ ਕੰਪਨੀਆਂ ਦੇ ਸ਼ੇਅਰਾਂ ਵਿੱਚ ਉਚਾਲ ਦਰਜ ਹੋਈ।
ਵਪਾਰ ਸਮਝੌਤੇ ਦੀ ਘੋਸ਼ਣਾ ਤੋਂ ਬਾਅਦ ਮੰਗਲਵਾਰ ਨੂੰ ਕਾਰੋਬਾਰ ਦੌਰਾਨ ਨਿਫਟੀ ਕਰੀਬ 5 ਪ੍ਰਤੀਸ਼ਤ ਵੱਧ ਕੇ 26,341 ਅੰਕ ਤੱਕ ਪਹੁੰਚ ਗਿਆ। ਸੈਂਸੈਕਸ ਵਿੱਚ ਵੀ 4,200 ਅੰਕ ਤੋਂ ਵੱਧ ਦੀ ਚੜ੍ਹਤ ਦਰਜ ਕੀਤੀ ਗਈ, ਜਿਸਨੂੰ ਫਰਵਰੀ 2021 ਤੋਂ ਬਾਅਦ ਦੀ ਸਭ ਤੋਂ ਵੱਡੀ ਇੰਟਰਾ-ਡੇ ਵਾਧਾ ਮੰਨਿਆ ਜਾ ਰਿਹਾ ਹੈ। ਸ਼ੁਰੂਆਤੀ ਉਚਾਲ ਤੋਂ ਬਾਅਦ ਕੁਝ ਮੁਨਾਫ਼ਾ ਵਸੂਲੀ ਵੇਖੀ ਗਈ ਪਰ ਬਾਜ਼ਾਰ ਕੁੱਲ ਮਿਲਾ ਕੇ ਸਥਿਰ ਦਾਇਰੇ ਵਿੱਚ ਬਣਿਆ ਰਿਹਾ।
ਇਸ ਬਾਜ਼ਾਰੀ ਗਤੀਵਿਧੀ ਤੋਂ ਸਭ ਤੋਂ ਵੱਧ ਲਾਭ ਅਦਾਣੀ ਗਰੁੱਪ ਦੀਆਂ ਕੰਪਨੀਆਂ ਨੂੰ ਹੋਇਆ। ਅਦਾਣੀ ਐਂਟਰਪ੍ਰਾਈਜ਼ਜ਼ ਦਾ ਸ਼ੇਅਰ ਕਾਰੋਬਾਰ ਦੌਰਾਨ ਕਰੀਬ 12 ਪ੍ਰਤੀਸ਼ਤ ਤੱਕ ਵਧ ਗਿਆ, ਜੋ ਨਵੰਬਰ 2024 ਤੋਂ ਬਾਅਦ ਇੱਕ ਦਿਨ ਦੀ ਸਭ ਤੋਂ ਵੱਡੀ ਚੜ੍ਹਤ ਹੈ। ਅਦਾਣੀ ਪੋਰਟਸ ਦੇ ਸ਼ੇਅਰ ਵਿੱਚ ਕਰੀਬ 8 ਪ੍ਰਤੀਸ਼ਤ ਦੀ ਤੇਜ਼ੀ ਦਰਜ ਹੋਈ। ਅਦਾਣੀ ਗ੍ਰੀਨ ਐਨਰਜੀ ਵਿੱਚ ਲਗਭਗ 12.7 ਪ੍ਰਤੀਸ਼ਤ ਦਾ ਉਛਾਲ ਆਇਆ। ਅਦਾਣੀ ਐਨਰਜੀ ਸੋਲੂਸ਼ਨਜ਼ ਕਰੀਬ 10 ਪ੍ਰਤੀਸ਼ਤ ਉੱਪਰ ਬੰਦ ਹੋਇਆ। ਅਦਾਣੀ ਪਾਵਰ ਦੇ ਸ਼ੇਅਰਾਂ ਵਿੱਚ ਵੀ ਲਗਭਗ 7.8 ਪ੍ਰਤੀਸ਼ਤ ਦੀ ਮਜ਼ਬੂਤੀ ਦਰਜ ਕੀਤੀ ਗਈ।
ਭਾਰਤ–ਅਮਰੀਕਾ ਵਪਾਰ ਸਮਝੌਤੇ ਤਹਿਤ ਅਮਰੀਕੀ ਬਾਜ਼ਾਰ ਵਿੱਚ ਭਾਰਤੀ ਉਤਪਾਦਾਂ ’ਤੇ ਲੱਗਣ ਵਾਲਾ ਟੈਰਿਫ 25 ਪ੍ਰਤੀਸ਼ਤ ਤੋਂ ਘਟਾ ਕੇ 18 ਪ੍ਰਤੀਸ਼ਤ ਕਰ ਦਿੱਤਾ ਗਿਆ ਹੈ। ਇਸਦੇ ਨਾਲ ਹੀ ਰੂਸ ਤੋਂ ਕੱਚੇ ਤੇਲ ਦੀ ਖਰੀਦ ’ਤੇ ਲੱਗੇ ਵਾਧੂ ਟੈਕਸ ਨੂੰ ਹਟਾਉਣ ਦਾ ਫੈਸਲਾ ਵੀ ਕੀਤਾ ਗਿਆ ਹੈ। ਇਨ੍ਹਾਂ ਤਬਦੀਲੀਆਂ ਨਾਲ ਭਾਰਤੀ ਕੰਪਨੀਆਂ ਦੀ ਲਾਗਤ ਸੰਰਚਨਾ ’ਤੇ ਅਸਰ ਪੈਣ ਦੀ ਉਮੀਦ ਜਤਾਈ ਗਈ ਹੈ।
ਅਦਾਣੀ ਗਰੁੱਪ ਦਾ ਵੱਡਾ ਕਾਰੋਬਾਰ ਐਨਰਜੀ, ਪਾਵਰ ਟ੍ਰਾਂਸਮਿਸ਼ਨ, ਨਵਨੀਕਰਣਯੋਗ ਊਰਜਾ, ਕੋਇਲਾ ਅਤੇ ਗੈਸ ਖੇਤਰਾਂ ਨਾਲ ਜੁੜਿਆ ਹੋਇਆ ਹੈ। ਸਮਝੌਤੇ ਤੋਂ ਬਾਅਦ ਕੱਚੇ ਤੇਲ ਅਤੇ ਐਨਰਜੀ ਨਾਲ ਸੰਬੰਧਿਤ ਟੈਕਸਾਂ ਵਿੱਚ ਤਬਦੀਲੀ ਨਾਲ ਓਪਰੇਟਿੰਗ ਖਰਚਾਂ ’ਤੇ ਪ੍ਰਭਾਵ ਪੈਣ ਦੀ ਸੰਭਾਵਨਾ ਦਰਸਾਈ ਗਈ ਹੈ।
ਪੋਰਟਸ ਅਤੇ ਲੋਜਿਸਟਿਕਸ ਖੇਤਰ ਵਿੱਚ ਵੀ ਵਪਾਰ ਸਮਝੌਤੇ ਕਾਰਨ ਗਤੀਵਿਧੀਆਂ ਵਧਣ ਦੀ ਉਮੀਦ ਕੀਤੀ ਜਾ ਰਹੀ ਹੈ। ਅਦਾਣੀ ਪੋਰਟਸ ਭਾਰਤ ਦੀਆਂ ਪ੍ਰਮੁੱਖ ਪੋਰਟ ਓਪਰੇਟਰ ਕੰਪਨੀਆਂ ਵਿੱਚੋਂ ਇੱਕ ਹੈ ਅਤੇ ਅਮਰੀਕਾ ਨਾਲ ਵਪਾਰ ਵਧਣ ਨਾਲ ਆਯਾਤ-ਨਿਰਯਾਤ ਵਾਲਿਊਮ ’ਤੇ ਅਸਰ ਪੈ ਸਕਦਾ ਹੈ।
ਮੀਡੀਆ ਰਿਪੋਰਟਾਂ ਮੁਤਾਬਕ ਅਦਾਣੀ ਗਰੁੱਪ ਦੀਆਂ ਤਿੰਨ ਕੰਪਨੀਆਂ ਜਪਾਨ ਤੋਂ ਕਰੀਬ 2 ਅਰਬ ਡਾਲਰ ਇਕੱਠੇ ਕਰਨ ਦੀ ਯੋਜਨਾ ’ਤੇ ਕੰਮ ਕਰ ਰਹੀਆਂ ਹਨ। ਕੰਪਨੀ ਵੱਲੋਂ ਇਸਨੂੰ ਨਿਯਮਤ ਵਪਾਰਕ ਪ੍ਰਕਿਰਿਆ ਦੱਸਿਆ ਗਿਆ ਹੈ। ਵਪਾਰ ਸਮਝੌਤੇ ਤੋਂ ਬਾਅਦ ਅੰਤਰਰਾਸ਼ਟਰੀ ਨਿਵੇਸ਼ਕਾਂ ਦੀ ਭਾਗੀਦਾਰੀ ਆਸਾਨ ਹੋ ਸਕਦੀ ਹੈ।
ਜਪਾਨ ਕਰੈਡਿਟ ਰੇਟਿੰਗ ਏਜੰਸੀ ਵੱਲੋਂ ਅਦਾਣੀ ਪੋਰਟਸ, ਅਦਾਣੀ ਗ੍ਰੀਨ ਐਨਰਜੀ ਅਤੇ ਅਦਾਣੀ ਐਨਰਜੀ ਸੋਲੂਸ਼ਨਜ਼ ਨੂੰ ਵਿਦੇਸ਼ੀ ਮੁਦਰਾ ਵਿੱਚ ਲੰਬੇ ਸਮੇਂ ਲਈ ਕਰੈਡਿਟ ਰੇਟਿੰਗ ਦਿੱਤੀ ਗਈ ਹੈ। ਇਹ ਅੰਤਰਰਾਸ਼ਟਰੀ ਪੱਧਰ ’ਤੇ ਕੰਪਨੀਆਂ ਦੀ ਵਿੱਤੀ ਪ੍ਰੋਫ਼ਾਈਲ ਨੂੰ ਸਥਿਰ ਮੰਨੇ ਜਾਣ ਦਾ ਸੰਕੇਤ ਦਿੰਦੀ ਹੈ।
