ਸਸਤੇ FMCG ਉਤਪਾਦਾਂ ਰਾਹੀਂ ਵਧੇਗੀ ਪੇਂਡੂ ਭਾਰਤ ਵਿੱਚ ਪਕੜ, 2027 ਤੱਕ ਰਾਸ਼ਟਰੀ ਵਿਸਤਾਰ ਦੀ ਰਣਨੀਤੀ
ਨਵੀਂ ਦਿੱਲੀ: ਦੇਸ਼ ਦੀ ਸਭ ਤੋਂ ਵੱਡੀ ਪ੍ਰਾਈਵੇਟ ਕੰਪਨੀ ਰਿਲਾਇੰਸ ਇੰਡਸਟਰੀਜ਼ ਹੁਣ FMCG ਸੈਕਟਰ ਵਿੱਚ ਵੱਡਾ ਦਾਅ ਖੇਡਣ ਜਾ ਰਹੀ ਹੈ। ਕੰਪਨੀ ਦਾ ਟੀਚਾ ਹੈ ਕਿ ਪਿੰਡ-ਪਿੰਡ ਤੱਕ ਆਪਣੀ ਪਹੁੰਚ ਬਣਾ ਕੇ ਸਸਤੇ ਅਤੇ ਗੁਣਵੱਤਾ ਵਾਲੇ ਉਤਪਾਦ ਦੇਸ਼ ਦੇ ਆਮ ਨਾਗਰਿਕਾਂ ਤੱਕ ਪਹੁੰਚਾਏ ਜਾਣ। ਇਸ ਰਣਨੀਤੀ ਤਹਿਤ ਰਿਲਾਇੰਸ ਨੇ ਦੇਸ਼ ਦੇ ਕਰੀਬ 60 ਕਰੋੜ ਮੱਧਮ ਵਰਗੀ ਉਪਭੋਗਤਾਵਾਂ ਨੂੰ ਆਪਣਾ ਟਾਰਗੇਟ ਬਣਾਇਆ ਹੈ।
ਪੇਂਡੂ ਭਾਰਤ 'ਤੇ ਫੋਕਸ
ਰਿਲਾਇੰਸ ਕੰਜ਼ਿਊਮਰ ਪ੍ਰੋਡਕਟਸ ਲਿਮਟਿਡ (RCPL) ਦੇ ਡਾਇਰੈਕਟਰ ਟੀ. ਕਿ੍ਰਸ਼ਨ ਕੁਮਾਰ ਨੇ ਕਿਹਾ ਕਿ ਭਾਰਤ ਦੀ 1.4 ਅਰਬ ਦੀ ਆਬਾਦੀ ਵਿੱਚੋਂ ਇੱਕ ਵੱਡਾ ਹਿੱਸਾ ਅਜਿਹਾ ਹੈ, ਜੋ ਅਜੇ ਵੀ FMCG ਬਾਜ਼ਾਰ ਵਿੱਚ ਨਜ਼ਰਅੰਦਾਜ਼ ਕੀਤਾ ਜਾਂਦਾ ਰਿਹਾ ਹੈ। ਉਨ੍ਹਾਂ ਦੱਸਿਆ, “ਕਰੀਬ 60 ਕਰੋੜ ਉਪਭੋਗਤਾ ਅਜਿਹੇ ਹਨ ਜਿਨ੍ਹਾਂ ਲਈ ਚੰਗੀ ਕੁਆਲਿਟੀ ਦੇ ਕਿਫ਼ਾਇਤੀ ਉਤਪਾਦ ਬਣਾਏ ਜਾ ਸਕਦੇ ਹਨ, ਅਤੇ ਅਸੀਂ ਇਸੇ 'ਤੇ ਫੋਕਸ ਕਰ ਰਹੇ ਹਾਂ।”
ਮਹਿੰਗੇ ਉਤਪਾਦਾਂ ਨੂੰ ਚੁਣੌਤੀ
ਜਿੱਥੇ ਹੋਰ ਵੱਡੀਆਂ ਕੰਪਨੀਆਂ ਜਿਵੇਂ ਕਿ ਹਿੰਦੁਸਤਾਨ ਯੂਨੀਲੀਵਰ, ਆਈਟੀਸੀ, ਡਾਬਰ ਅਤੇ ਨੈਸਲੇ ਪ੍ਰੀਮੀਅਮ ਸੈਗਮੈਂਟ 'ਤੇ ਧਿਆਨ ਦੇ ਰਹੀਆਂ ਹਨ, ਉੱਥੇ ਰਿਲਾਇੰਸ ਆਮ ਲੋਕਾਂ ਨੂੰ ਸਸਤੇ ਉਤਪਾਦ ਉਪਲਬਧ ਕਰਾਉਣਾ ਚਾਹੁੰਦੀ ਹੈ। ਕੰਪਨੀ ਦੀ ਰਣਨੀਤੀ ਹੈ ਕਿ ਲੋਕਲ ਕਿਰਾਣਾ ਦੁਕਾਨਾਂ ਨਾਲ ਸਾਂਝੇਦਾਰੀ ਕਰਕੇ ਮਜ਼ਬੂਤ ਡਿਸਟ੍ਰੀਬਿਊਸ਼ਨ ਨੈੱਟਵਰਕ ਤਿਆਰ ਕੀਤਾ ਜਾਵੇ ਅਤੇ ਦੁਕਾਨਦਾਰਾਂ ਨੂੰ ਚੰਗਾ ਮਾਰਜਿਨ ਦੇ ਕੇ ਉਨ੍ਹਾਂ ਨੂੰ ਜੋੜਿਆ ਜਾਵੇ।
ਹੁਣ ਤੱਕ 15 ਤੋਂ ਵੱਧ ਬ੍ਰਾਂਡ ਖਰੀਦੇ
ਰਿਲਾਇੰਸ ਨੇ 2022 ਵਿੱਚ FMCG ਸੈਕਟਰ ਵਿੱਚ ਕਦਮ ਰੱਖਦੇ ਹੋਏ ਹੁਣ ਤੱਕ 15 ਤੋਂ ਵੱਧ ਬ੍ਰਾਂਡਾਂ ਦਾ ਅਧਿਗ੍ਰਹਿਣ ਕੀਤਾ ਹੈ। ਇਨ੍ਹਾਂ ਵਿੱਚ ਕੈਂਪਾ ਕੋਲਡ ਡਰਿੰਕ, ਲੋਟਸ ਚਾਕਲੇਟ, ਟੌਫ਼ਮੈਨ, ਰਾਵਲਗਾਂਵ, Sil ਜੈਮ, ਐਲਨ ਬਗਲਸ ਸਨੈਕਸ, ਵੈਲਵੈਟ ਸ਼ੈਂਪੂ ਅਤੇ ਇੰਡੀਪੈਂਡੈਂਸ ਸਟੇਪਲਸ ਸ਼ਾਮਲ ਹਨ। ਕੰਪਨੀ ਦੀ ਯੋਜਨਾ ਹੈ ਕਿ ਮਾਰਚ 2027 ਤੱਕ ਇਨ੍ਹਾਂ ਸਾਰੇ ਬ੍ਰਾਂਡਾਂ ਦੀ ਰਾਸ਼ਟਰੀ ਪੱਧਰ 'ਤੇ ਹੋਂਦ ਦਰਜ ਕੀਤੀ ਜਾਵੇ।
FY25 ਵਿੱਚ ਸ਼ਾਨਦਾਰ ਪ੍ਰਦਰਸ਼ਨ
ਵਿੱਤੀ ਸਾਲ 2025 ਵਿੱਚ RCPL ਨੇ 11,500 ਕਰੋੜ ਰੁਪਏ ਦਾ ਰੈਵੇਨਿਊ ਦਰਜ ਕੀਤਾ, ਜਿਸ ਵਿੱਚੋਂ 60% ਵਿਕਰੀ ਜਨਰਲ ਟਰੇਡ ਤੋਂ ਆਈ। ਕੰਪਨੀ ਦਾ ਦਾਅਵਾ ਹੈ ਕਿ ਕੈਂਪਾ ਅਤੇ ਇੰਡੀਪੈਂਡੈਂਸ ਬ੍ਰਾਂਡ ਦੀ ਵਿਕਰੀ 1,000 ਕਰੋੜ ਰੁਪਏ ਤੋਂ ਵੱਧ ਰਹੀ ਅਤੇ ਇਨ੍ਹਾਂ ਦਾ ਨੈੱਟਵਰਕ 10 ਲੱਖ ਦੁਕਾਨਾਂ ਤੱਕ ਪਹੁੰਚ ਚੁੱਕਾ ਹੈ।
ਬਾਜ਼ਾਰ ਵਿੱਚ ਮੁਕਾਬਲੇਬਾਜ਼ ਕੀਮਤ ਨਿਰਧਾਰਨ
ਰਿਲਾਇੰਸ ਨੇ ਆਪਣੇ ਸਾਰੇ ਪ੍ਰਮੁੱਖ ਉਤਪਾਦਾਂ ਦੀ ਕੀਮਤ ਨੂੰ ਬਾਜ਼ਾਰ ਦੀਆਂ ਵੱਡੀਆਂ ਕੰਪਨੀਆਂ ਨਾਲੋਂ 20-40% ਤੱਕ ਘੱਟ ਰੱਖਿਆ ਹੈ। ਸੌਫਟ ਡਰਿੰਕਸ, ਚਾਕਲੇਟ ਅਤੇ ਡਿਟਰਜੈਂਟ ਵਰਗੀਆਂ ਸ਼੍ਰੇਣੀਆਂ ਵਿੱਚ ਕੰਪਨੀ ਨੇ ਕੋਕਾ-ਕੋਲਾ, ਮੋਂਡੇਲੇਜ਼ ਅਤੇ HUL ਵਰਗੀਆਂ ਕੰਪਨੀਆਂ ਨੂੰ ਸਿੱਧਾ ਟੱਕਰ ਦਿੱਤੀ ਹੈ।
ਅੱਗੇ ਦੀ ਰਣਨੀਤੀ
ਕੰਪਨੀ ਦਾ ਟੀਚਾ ਹੈ ਕਿ ਮਾਰਚ 2026 ਤੱਕ ਉਹ ਪੀਣ ਵਾਲੇ ਪਦਾਰਥਾਂ ਅਤੇ ਸਟੇਪਲਸ ਵਿੱਚ 60-70% ਬਾਜ਼ਾਰ ਹਿੱਸੇਦਾਰੀ ਪ੍ਰਾਪਤ ਕਰੇ। ਕਿ੍ਰਸ਼ਨ ਕੁਮਾਰ ਦੇ ਅਨੁਸਾਰ, “ਅਸੀਂ ਜੈਵਿਕ ਵਿਕਾਸ ਅਤੇ ਅਧਿਗ੍ਰਹਿਣ ਦੋਨਾਂ ਤਰੀਕਿਆਂ ਨਾਲ ਅੱਗੇ ਵਧਾਂਗੇ, ਪਰ ਕਿਸੇ ਵੀ ਬ੍ਰਾਂਡ ਲਈ ਜ਼ਿਆਦਾ ਕੀਮਤ ਨਹੀਂ ਦਿੱਤੀ ਜਾਵੇਗੀ।”
ਰਿਲਾਇੰਸ ਦੀ ਇਹ ਰਣਨੀਤੀ ਭਾਰਤ ਦੇ FMCG ਬਾਜ਼ਾਰ ਵਿੱਚ ਵੱਡਾ ਬਦਲਾਅ ਲਿਆ ਸਕਦੀ ਹੈ। ਕੰਪਨੀ ਜਿੱਥੇ ਇੱਕ ਪਾਸੇ ਪੇਂਡੂ ਭਾਰਤ ਨੂੰ ਸਸਤੇ ਅਤੇ ਭਰੋਸੇਮੰਦ ਵਿਕਲਪ ਦੇ ਰਹੀ ਹੈ, ਉੱਥੇ ਦੂਜੇ ਪਾਸੇ ਦੇਸ਼ ਦੀਆਂ ਵੱਡੀਆਂ FMCG ਕੰਪਨੀਆਂ ਲਈ ਇਹ ਇੱਕ ਵੱਡੀ ਚੁਣੌਤੀ ਬਣ ਸਕਦੀ ਹੈ।
