WhatsApp Business ਨੇ 7 ਮਈ ਨੂੰ ਭਾਰਤ ਵਿੱਚ ਆਪਣਾ ਨਵਾਂ Business AI ਏਜੰਟ ਲਾਂਚ ਕੀਤਾ ਹੈ, ਜਿਸਨੂੰ ਖਾਸ ਤੌਰ ‘ਤੇ ਛੋਟੇ ਅਤੇ ਮੱਧਮ ਕਾਰੋਬਾਰਾਂ ਦੀਆਂ ਜ਼ਰੂਰਤਾਂ ਨੂੰ ਧਿਆਨ ਵਿੱਚ ਰੱਖਦੇ ਹੋਏ ਤਿਆਰ ਕੀਤਾ ਗਿਆ ਹੈ। ਕੰਪਨੀ ਮੁਤਾਬਕ ਇਹ ਫੀਚਰ 24x7 ਗਾਹਕ ਸਹਾਇਤਾ, ਲੀਡ ਮੈਨੇਜਮੈਂਟ ਅਤੇ ਸੇਲਜ਼ ਵਧਾਉਣ ਵਿੱਚ ਮਦਦ ਕਰੇਗਾ। ਇਹ ਸੁਵਿਧਾ WhatsApp Business ਐਪ ਰਾਹੀਂ ਕਈ ਭਾਰਤੀ ਸਥਾਨਕ ਭਾਸ਼ਾਵਾਂ ਵਿੱਚ ਉਪਲਬਧ ਹੋਵੇਗੀ।
ਕੰਪਨੀ ਦੇ ਅਨੁਸਾਰ Business AI ਏਜੰਟ ਗਾਹਕਾਂ ਦੇ ਸਵਾਲਾਂ ਦੇ ਆਟੋਮੈਟਿਕ ਜਵਾਬ ਦੇਣ, ਅਪਾਇੰਟਮੈਂਟ ਬੁੱਕ ਕਰਨ, ਪ੍ਰੋਡਕਟ ਰਿਕਮੈਂਡੇਸ਼ਨ ਦੇਣ ਅਤੇ ਸੇਲਜ਼ ਕਨਵਰਜ਼ਨ ਵਧਾਉਣ ਵਿੱਚ ਮਦਦ ਕਰੇਗਾ। ਇਸ ਰਾਹੀਂ ਕਾਰੋਬਾਰੀ ਮਾਲਕ ਲੀਡ ਕੈਪਚਰ ਕਰ ਸਕਣਗੇ ਅਤੇ ਗਾਹਕਾਂ ਨਾਲ ਲਗਾਤਾਰ ਸੰਚਾਰ ਬਣਾਈ ਰੱਖ ਸਕਣਗੇ।
AI ਏਜੰਟ ਸੈਟਅੱਪ ਹੋਣ ਤੋਂ ਬਾਅਦ ਇਹ ਕਾਰੋਬਾਰ ਦੀਆਂ ਪੁਰਾਣੀਆਂ ਚੈਟਾਂ, ਪ੍ਰੋਫ਼ਾਈਲ ਅਤੇ ਵੈੱਬਸਾਈਟ ਤੋਂ ਜਾਣਕਾਰੀ ਲੈ ਕੇ ਕੰਮ ਕਰੇਗਾ। ਕੰਪਨੀ ਨੇ ਕਿਹਾ ਹੈ ਕਿ ਇਸਨੂੰ WhatsApp Catalog ਅਤੇ Meta Commerce Manager ਰਾਹੀਂ ਵੀ ਟ੍ਰੇਨ ਕੀਤਾ ਜਾ ਸਕਦਾ ਹੈ, ਜਿਸ ਨਾਲ ਇਹ ਗਾਹਕਾਂ ਨੂੰ ਹੋਰ ਸਹੀ ਅਤੇ ਵਿਅਕਤੀਗਤ ਜਵਾਬ ਦੇ ਸਕੇਗਾ।
ਇਹ AI ਸਿਸਟਮ ਗਾਹਕਾਂ ਨੂੰ ਪ੍ਰੋਡਕਟ, ਕੀਮਤ, ਆਫ਼ਰ, ਡਿਸਕਾਊਂਟ ਅਤੇ ਸ਼ਿਪਿੰਗ ਨਾਲ ਸੰਬੰਧਿਤ ਜਾਣਕਾਰੀ ਪ੍ਰਦਾਨ ਕਰਨ ਵਿੱਚ ਮਦਦ ਕਰੇਗਾ। ਇਸਦੇ ਨਾਲ ਹੀ FAQ ਯਾਨੀ ਅਕਸਰ ਪੁੱਛੇ ਜਾਣ ਵਾਲੇ ਸਵਾਲਾਂ ਦੇ ਜਵਾਬ ਵੀ ਆਟੋਮੈਟਿਕ ਤਰੀਕੇ ਨਾਲ ਦਿੱਤੇ ਜਾਣਗੇ।
Meta India ਵਿੱਚ ਬਿਜ਼ਨਸ ਮੈਸੇਜਿੰਗ ਡਾਇਰੈਕਟਰ Ravi Garg ਦੇ ਅਨੁਸਾਰ ਕੰਪਨੀ ਪਿਛਲੇ ਕੁਝ ਮਹੀਨਿਆਂ ਤੋਂ ਚੁਣਿੰਦੇ ਕਾਰੋਬਾਰਾਂ ਨਾਲ ਮਿਲ ਕੇ ਇਸ ਫੀਚਰ ਦਾ ਪਾਇਲਟ ਟੈਸਟ ਕਰ ਰਹੀ ਸੀ। ਕੰਪਨੀ ਮੁਤਾਬਕ ਭਾਰਤ ਤੋਂ ਇਲਾਵਾ ਇਹ ਫੀਚਰ ਬ੍ਰਾਜ਼ੀਲ ਅਤੇ ਕਾਂਬੋਡੀਆ ਵਰਗੇ ਬਾਜ਼ਾਰਾਂ ਵਿੱਚ ਵੀ ਉਪਲਬਧ ਹੈ।
ਕੰਪਨੀ ਨੇ ਕਾਰੋਬਾਰੀ ਮਾਲਕਾਂ ਨੂੰ AI ਕੰਟਰੋਲ ਲਈ ਕਈ ਵਿਕਲਪ ਵੀ ਦਿੱਤੇ ਹਨ। ਮਾਲਕ ਇਹ ਤੈਅ ਕਰ ਸਕਣਗੇ ਕਿ AI ਸਿਰਫ਼ ਨਵੇਂ ਗਾਹਕਾਂ ਨਾਲ ਗੱਲ ਕਰੇ, ਵਿਗਿਆਪਨਾਂ ਤੋਂ ਆਉਣ ਵਾਲੇ ਯੂਜ਼ਰਾਂ ਨੂੰ ਜਵਾਬ ਦੇਵੇ ਜਾਂ ਸਾਰੇ ਗਾਹਕਾਂ ਨਾਲ ਸੰਚਾਰ ਸੰਭਾਲੇ।
ਜੇਕਰ ਗੱਲਬਾਤ ਸੰਵੇਦਨਸ਼ੀਲ ਜਾਂ ਜਟਿਲ ਹੋ ਜਾਵੇ ਤਾਂ AI ਉਸਨੂੰ ਸਿੱਧਾ ਕਾਰੋਬਾਰੀ ਮਾਲਕ ਤੱਕ ਟ੍ਰਾਂਸਫਰ ਕਰ ਸਕੇਗਾ। ਗਾਹਕਾਂ ਨੂੰ ਭੇਜੇ ਜਾਣ ਵਾਲੇ ਮੈਸੇਜ ‘ਤੇ “AI” ਲੇਬਲ ਦਿਖਾਈ ਦੇਵੇਗਾ, ਤਾਂ ਜੋ ਉਹ ਜਾਣ ਸਕਣ ਕਿ ਜਵਾਬ AI ਵੱਲੋਂ ਆ ਰਿਹਾ ਹੈ।
Meta ਨੇ ਇਹ ਵੀ ਸੰਕੇਤ ਦਿੱਤਾ ਹੈ ਕਿ ਜਲਦ ਹੀ WhatsApp ਚੈਟ ਦੇ ਅੰਦਰ UPI ਭੁਗਤਾਨ ਸੁਵਿਧਾ ਜੋੜੀ ਜਾ ਸਕਦੀ ਹੈ। ਭਵਿੱਖ ਵਿੱਚ ਹੋਰ ਭੁਗਤਾਨ ਵਿਕਲਪ ਵੀ ਸ਼ਾਮਲ ਕੀਤੇ ਜਾ ਸਕਦੇ ਹਨ।
ਪਾਇਲਟ ਪ੍ਰੋਗਰਾਮ ਦਾ ਹਿੱਸਾ ਰਹੀ The Purple Sunset ਦੀ ਸੰਸਥਾਪਕ Gunveen Kaur ਨੇ ਕਿਹਾ ਕਿ AI ਏਜੰਟ ਦੀ ਮਦਦ ਨਾਲ ਉਹ ਹਰ ਰੋਜ਼ 6 ਤੋਂ 7 ਆਰਡਰ ਸਿੱਧੇ ਤੌਰ ‘ਤੇ ਕਲੋਜ਼ ਕਰਨ ਵਿੱਚ ਸਫਲ ਰਹੀ। ਉਨ੍ਹਾਂ ਦੇ ਅਨੁਸਾਰ ਕਾਰੋਬਾਰ ਦੀ ਸੇਲਜ਼ ਵਿੱਚ ਕਰੀਬ 40 ਪ੍ਰਤੀਸ਼ਤ ਤੱਕ ਵਾਧਾ ਦਰਜ ਕੀਤਾ ਗਿਆ।
Meta ਦੇ ਅਨੁਸਾਰ ਭਵਿੱਖ ਵਿੱਚ ਟੈਕਸਟ ਅਤੇ ਇਮੇਜ ਤੋਂ ਇਲਾਵਾ ਵੀਡੀਓ ਵਰਗੀਆਂ AI ਸਮਰੱਥਾਵਾਂ ਨੂੰ ਵੀ ਇਸ ਪਲੇਟਫਾਰਮ ਵਿੱਚ ਸ਼ਾਮਲ ਕੀਤਾ ਜਾਵੇਗਾ, ਤਾਂ ਜੋ ਛੋਟੇ ਕਾਰੋਬਾਰ ਗਾਹਕਾਂ ਨਾਲ ਹੋਰ ਪ੍ਰਭਾਵਸ਼ਾਲੀ ਢੰਗ ਨਾਲ ਜੁੜ ਸਕਣ।
