ਮੰਗਲਵਾਰ ਨੂੰ ਬੀਸੀਏ ਸਟੇਡੀਅਮ ਵਿੱਚ ਖੇਡੇ ਗਏ ਵੁਮੇਨਜ਼ ਪ੍ਰੀਮੀਅਰ ਲੀਗ 2026 ਦੇ 13ਵੇਂ ਮੈਚ ਵਿੱਚ ਦਿੱਲੀ ਕੈਪੀਟਲਜ਼ ਨੇ ਮੁੰਬਈ ਇੰਡੀਅਨਜ਼ ਨੂੰ ਸੱਤ ਵਿਕਟਾਂ ਨਾਲ ਹਰਾਕੇ ਸੀਜ਼ਨ ਦੀ ਦੂਜੀ ਜਿੱਤ ਦਰਜ ਕੀਤੀ।
ਟੌਸ ਹਾਰ ਕੇ ਪਹਿਲਾਂ ਬੱਲੇਬਾਜ਼ੀ ਕਰਦੀ ਮੁੰਬਈ ਇੰਡੀਅਨਜ਼ ਦੀ ਸ਼ੁਰੂਆਤ ਕਾਫ਼ੀ ਕਮਜ਼ੋਰ ਰਹੀ ਅਤੇ ਟੀਮ ਨੇ 21 ਦੌੜਾਂ ਦੇ ਸਕੋਰ ‘ਤੇ ਦੋਵੇਂ ਸਲਾਮੀ ਬੱਲੇਬਾਜ਼ਾਂ ਦੇ ਵਿਕਟ ਗਵਾ ਦਿੱਤੇ। ਸਜੀਵਨ ਸਜਨਾ ਨੇ 9 ਦੌੜਾਂ ਬਣਾਈਆਂ ਜਦਕਿ ਹੇਲੀ ਮੈਥਿਊਜ਼ ਸਿਰਫ਼ 12 ਦੌੜਾਂ ਹੀ ਜੋੜ ਸਕੀ। ਇਸ ਤੋਂ ਬਾਅਦ ਨੈਟ ਸਾਈਵਰ-ਬਰੰਟ ਅਤੇ ਕਪਤਾਨ ਹਰਮਨਪ੍ਰੀਤ ਕੌਰ ਨੇ ਤੀਜੇ ਵਿਕਟ ਲਈ 58 ਗੇਂਦਾਂ ਵਿੱਚ 78 ਦੌੜਾਂ ਦੀ ਭਾਈਚਾਰਕ ਸਾਂਝ ਬਣਾਈ। ਹਰਮਨਪ੍ਰੀਤ ਕੌਰ ਨੇ 33 ਗੇਂਦਾਂ ਵਿੱਚ ਸੱਤ ਚੌਕਿਆਂ ਦੀ ਮਦਦ ਨਾਲ 41 ਦੌੜਾਂ ਬਣਾਈਆਂ।
ਕਪਤਾਨ ਦੇ ਆਉਟ ਹੋਣ ਤੋਂ ਬਾਅਦ ਸਾਈਵਰ-ਬਰੰਟ ਨੇ ਨਿਕੋਲਾ ਕੇਰੀ ਨਾਲ ਮਿਲ ਕੇ ਪਾਰੀ ਨੂੰ ਅੱਗੇ ਵਧਾਇਆ। ਕੇਰੀ ਨੇ 12 ਦੌੜਾਂ ਦਾ ਯੋਗਦਾਨ ਦਿੱਤਾ। ਸਾਈਵਰ-ਬਰੰਟ ਨੇ 45 ਗੇਂਦਾਂ ਵਿੱਚ ਨਾਬਾਦ 65 ਦੌੜਾਂ ਬਣਾਈਆਂ, ਜਿਸ ਵਿੱਚ ਛੇ ਚੌਕੇ ਅਤੇ ਦੋ ਛੱਕੇ ਸ਼ਾਮਲ ਸਨ। ਮੁੰਬਈ ਇੰਡੀਅਨਜ਼ ਨੇ ਨਿਰਧਾਰਤ 20 ਓਵਰਾਂ ਵਿੱਚ ਪੰਜ ਵਿਕਟਾਂ ‘ਤੇ 154 ਦੌੜਾਂ ਬਣਾਈਆਂ। ਦਿੱਲੀ ਵੱਲੋਂ ਸ਼੍ਰੀ ਚਰਣੀ ਨੇ ਤਿੰਨ ਵਿਕਟਾਂ ਲਈਆਂ ਜਦਕਿ ਮੈਰਿਜ਼ਾਨ ਕੈਪ ਅਤੇ ਨੰਦਿਨੀ ਸ਼ਰਮਾ ਨੇ ਇੱਕ-ਇੱਕ ਵਿਕਟ ਹਾਸਲ ਕੀਤੀ।
155 ਦੌੜਾਂ ਦੇ ਲਕਸ਼ ਨੂੰ ਪੂਰਾ ਕਰਨ ਲਈ ਉਤਰੀ ਦਿੱਲੀ ਕੈਪੀਟਲਜ਼ ਨੂੰ ਸ਼ੇਫਾਲੀ ਵਰਮਾ ਅਤੇ ਲਿਜ਼ੇਲੀ ਲੀ ਨੇ ਮਜ਼ਬੂਤ ਸ਼ੁਰੂਆਤ ਦਿਵਾਈ। ਦੋਹਾਂ ਨੇ ਪਹਿਲੇ ਵਿਕਟ ਲਈ 7.3 ਓਵਰਾਂ ਵਿੱਚ 63 ਦੌੜਾਂ ਦੀ ਸਾਂਝ ਬਣਾਈ। ਸ਼ੇਫਾਲੀ ਵਰਮਾ ਨੇ 24 ਗੇਂਦਾਂ ਵਿੱਚ ਛੇ ਚੌਕਿਆਂ ਦੀ ਮਦਦ ਨਾਲ 29 ਦੌੜਾਂ ਬਣਾਈਆਂ। ਇਸ ਤੋਂ ਬਾਅਦ ਲਿਜ਼ੇਲੀ ਲੀ ਨੇ ਲੌਰਾ ਵੋਲਵਾਰਡ ਨਾਲ ਪਾਰੀ ਅੱਗੇ ਵਧਾਈ। ਲੀ ਨੇ 46 ਦੌੜਾਂ ਬਣਾਈਆਂ, ਜਿਸ ਵਿੱਚ ਸੱਤ ਚੌਕੇ ਅਤੇ ਇੱਕ ਛੱਕਾ ਸ਼ਾਮਲ ਸੀ।
ਮੱਧ ਕ੍ਰਮ ਵਿੱਚ ਕੁਝ ਵਿਕਟ ਡਿੱਗਣ ਤੋਂ ਬਾਅਦ ਕਪਤਾਨ ਜੇਮਿਮਾ ਰੋਡ੍ਰਿਗਜ਼ ਨੇ ਜ਼ਿੰਮੇਵਾਰੀ ਸੰਭਾਲੀ। ਉਨ੍ਹਾਂ ਨੇ ਲੌਰਾ ਵੋਲਵਾਰਡ ਅਤੇ ਫਿਰ ਮੈਰਿਜ਼ਾਨ ਕੈਪ ਨਾਲ ਉਪਯੋਗੀ ਸਾਂਝਾਂ ਬਣਾਈਆਂ। ਜੇਮਿਮਾ ਨੇ 37 ਗੇਂਦਾਂ ਵਿੱਚ ਨਾਬਾਦ 51 ਦੌੜਾਂ ਬਣਾਈਆਂ, ਜਿਸ ਵਿੱਚ ਪੰਜ ਚੌਕੇ ਅਤੇ ਇੱਕ ਛੱਕਾ ਸ਼ਾਮਲ ਸੀ। ਅਖੀਰ ਵਿੱਚ ਮੈਰਿਜ਼ਾਨ ਕੈਪ ਨੇ ਛੇ ਗੇਂਦਾਂ ਵਿੱਚ ਨਾਬਾਦ 10 ਦੌੜਾਂ ਬਣਾਕੇ ਜਿੱਤ ‘ਤੇ ਮੋਹਰ ਲਗਾਈ। ਦਿੱਲੀ ਕੈਪੀਟਲਜ਼ ਨੇ 19 ਓਵਰਾਂ ਵਿੱਚ ਲਕਸ਼ ਹਾਸਲ ਕਰ ਲਿਆ।
ਇਸ ਹਾਰ ਨਾਲ ਮੁੰਬਈ ਇੰਡੀਅਨਜ਼ ਨੇ ਲਗਾਤਾਰ ਤੀਜੀ ਹਾਰ ਦਾ ਸਾਹਮਣਾ ਕੀਤਾ, ਹਾਲਾਂਕਿ ਟੀਮ ਛੇ ਵਿੱਚੋਂ ਚਾਰ ਮੈਚ ਹਾਰਨ ਦੇ ਬਾਵਜੂਦ ਅੰਕ ਸੂਚੀ ਵਿੱਚ ਦੂਜੇ ਸਥਾਨ ‘ਤੇ ਬਣੀ ਹੋਈ ਹੈ। ਦਿੱਲੀ ਕੈਪੀਟਲਜ਼ ਨੇ ਪੰਜ ਵਿੱਚੋਂ ਦੋ ਮੈਚ ਜਿੱਤ ਕੇ ਚੌਥਾ ਸਥਾਨ ਹਾਸਲ ਕੀਤਾ ਹੈ। ਰੋਯਲ ਚੈਲੇਂਜਰਜ਼ ਬੈਂਗਲੁਰੂ ਪਹਿਲਾਂ ਹੀ ਅਗਲੇ ਦੌਰ ਲਈ ਕਵਾਲੀਫਾਈ ਕਰ ਚੁੱਕੀ ਹੈ, ਜਦਕਿ ਬਾਕੀ ਚਾਰ ਟੀਮਾਂ ਪਲੇਆਫ਼ ਦੀ ਦੌੜ ਵਿੱਚ ਹਨ।
