جنوبی افریقہ کے سابق کپتان اور ورلڈ کرکٹ میں مسٹر 360 ڈگری کے نام سے مشہور اے بی ڈی ولیئرس آج یعنی 17 فروری 2025 کو اپنا 41 واں یومِ پیدائش منا رہے ہیں۔ ڈی ولیئرس اپنی شاندار اور جارحانہ بیٹنگ کیلئے جانے جاتے ہیں۔ ان کی بیٹنگ میں موجود تنوع اور چالاکی نے انہیں دنیا بھر میں ایک منفرد شناخت دی ہے۔
ڈی ولیئرس کی خاص بات یہ تھی کہ وہ گیند کو کسی بھی سمت اور کسی بھی کونے میں بھیجنے کی صلاحیت رکھتے تھے۔ یہی صلاحیت انہیں 360 ڈگری کھلاڑی کے طور پر پہچان دلانے میں کامیاب رہی۔ اے بی ڈی ولیئرس نے اپنی فنی مہارت، شاندار شاٹ سلیکشن اور تیزی کے ساتھ کرکٹ کی دنیا میں نئے معیارات قائم کیے۔
ان کے نام کچھ ایسے ریکارڈ بھی ہیں جن کو توڑنا دیگر کھلاڑیوں کے لیے ایک بڑا چیلنج بن چکا ہے۔ ان میں سے ایک ان کا 2015 میں ایک روزہ کرکٹ میں 31 گیندوں پر سنچری بنانے کا ریکارڈ ہے جو اب تک کسی اور کھلاڑی نے نہیں توڑ پایا۔ اس کے علاوہ ان کی وکٹ کیپنگ اور بیٹنگ میں استحکام نے انہیں ایک مثالی کرکٹر بنا دیا۔
ایک روزہ میچوں میں کم ترین گیندوں پر ففٹی
اے بی ڈی ولیئرس نے سال 2015 میں ویسٹ انڈیز کے خلاف صرف 16 گیندوں پر اپنی ففٹی مکمل کی جو آج بھی ایک روزہ کرکٹ میں تیز ترین نصف سنچری بنانے کا ریکارڈ ہے۔ اس سے پہلے یہ ریکارڈ سنیتھ جے سورایا کے نام تھا جنہوں نے 1996 میں پاکستان کے خلاف 17 گیندوں پر ففٹی بنائی تھی۔
ایک روزہ میچوں میں تیز ترین سنچری
اے بی ڈی ولیئرس کے نام ایک روزہ میچوں میں کم ترین گیندوں پر سنچری بنانے کا ریکارڈ بھی ہے۔ انہوں نے 2015 میں ویسٹ انڈیز کے خلاف صرف 31 گیندوں پر سنچری مکمل کی۔ اس سے پہلے یہ ریکارڈ کوری اینڈرسن کے نام تھا جنہوں نے 2014 میں ویسٹ انڈیز کے خلاف 36 گیندوں پر سنچری بنائی تھی۔
ٹیسٹ میچوں میں صفر پر آؤٹ ہونے سے پہلے مسلسل سب سے زیادہ اننگز کھیلنے کا ریکارڈ
ٹیسٹ کرکٹ میں اے بی ڈی ولیئرس کے نام 78 مسلسل اننگز تک صفر پر آؤٹ نہ ہونے کا ریکارڈ ہے۔ انہوں نے 2008-09 میں بنگلہ دیش کے خلاف سینچورین ٹیسٹ میں صفر پر آؤٹ ہونے سے پہلے 78 اننگز کھیلی تھیں۔
اے بی ڈی ولیئرس کا بین الاقوامی ریکارڈ
* ٹیسٹ کرکٹ: 114 میچوں میں 8765 رنز، جس میں 22 سنچریاں اور 46 نصف سنچریاں شامل ہیں۔
* ایک روزہ کرکٹ: 228 میچوں میں 9577 رنز، اوسط 53.5، جس میں 25 سنچریاں اور 53 نصف سنچریاں شامل ہیں۔
* ٹی ٹوئنٹی انٹرنیشنل: 78 میچوں میں 1672 رنز، جس میں 10 نصف سنچریاں شامل ہیں۔
