بہار اسمبلی میں لالی پاپ اور چھنچھنے سے بجٹ کی مخالفت

منگل کے روز بہار کی اسمبلی میں ایک غیر معمولی منظر دیکھنے کو ملا جب راشٹریہ جنتا دل (راجد) کے رکن اسمبلی مکیش روشن لالی پاپ، چھنچھنے اور بالون لے کر اسمبلی پہنچے۔

پٹنہ: منگل کے روز بہار کی اسمبلی میں ایک غیر معمولی منظر دیکھنے کو ملا جب راشٹریہ جنتا دل (راجد) کے رکن اسمبلی مکیش روشن لالی پاپ، چھنچھنے اور بالون لے کر اسمبلی پہنچے۔ انہوں نے یہ مظاہرہ ریاست کے بجٹ 2025-26 کی مخالفت میں کیا اور نتیش حکومت پر عوام کو گمراہ کرنے کا الزام عائد کیا۔

مکیش روشن نے اسمبلی کے احاطے میں میڈیا سے بات کرتے ہوئے کہا کہ نتیش کمار کی حکومت ہر محاذ پر ناکام ہوئی ہے اور بجٹ میں عوام کے لیے کچھ بھی ٹھوس نہیں ہے۔ انہوں نے کہا، "بہار کی عوام کو حکومت لالی پاپ اور چھنچھنے پکڑا رہی ہے۔ یہ بجٹ صرف دکھاوے کا ہے اور اس سے عام لوگوں کو کوئی راحت نہیں ملے گی۔"

تیجسوی یادو نے بھی بجٹ پر حملہ کیا

اپوزیشن لیڈر تیجسوی یادو نے بھی اس بجٹ کو بالکل ہی خالی قرار دیتے ہوئے حکومت پر خوب زور دار حملہ کیا۔ انہوں نے کہا کہ وزیر اعلیٰ نتیش کمار نے وزیر خزانہ سمرٹ چوہدری کی پشت تھپتھپا کر بجٹ کے خالی پن سے توجہ ہٹانے کی ناکام کوشش کی ہے۔ تیجسوی نے کہا، "حکومت کے بجٹ میں کوئی ٹھوس منصوبہ نہیں ہے۔ اس کا حجم تو بڑھا دیا گیا، لیکن یہ نہیں بتایا گیا کہ رقم کہاں سے آئے گی۔ یہ عوام کو گمراہ کرنے والا بجٹ ہے۔"

راجد سمیت کانگریس اور دیگر اپوزیشن جماعتوں نے بھی اس بجٹ کو مسترد کر دیا ہے۔ اپوزیشن نے کہا کہ حکومت نے ہماری مانگوں کو بالکل نظر انداز کر دیا ہے۔ تیجسوی یادو نے کہا کہ حکومت کو خواتین کے لیے میری بہن عزت اسکیم کے تحت ہر ماہ 2500 روپے دینے کا اعلان کرنا چاہیے تھا، لیکن اس پر کوئی توجہ نہیں دی گئی۔

بہار میں احتجاج جاری رہے گا

اپوزیشن جماعتوں نے اشارہ دیا ہے کہ وہ اس بجٹ کا مسلسل مخالفت کریں گی اور اسمبلی کے اندر اور باہر عوام کے درمیان جا کر حکومت کی پالیسیوں کی قلعی کھولیں گی۔ مکیش روشن نے کہا کہ یہ احتجاج صرف اسمبلی تک محدود نہیں رہے گا، بلکہ اسے عوام کے درمیان لے جایا جائے گا تاکہ لوگ سمجھ سکیں کہ حکومت انہیں صرف لالی پاپ پکڑا رہی ہے۔ بہار اسمبلی کا یہ اجلاس کافی ہنگامہ آمیز رہنے کی امید ہے، کیونکہ اپوزیشن حکومت کو ہر محاذ پر گھیرنے کے موڈ میں ہے۔