દુબઈના જાણીતા ટ્રાવેલ ઇન્ફ્લુએન્સર અને ફોટોગ્રાફર અનુનય સૂદના નિધનના સમાચારથી તેમના લાખો પ્રશંસકો શોકમાં ગરકાવ થઈ ગયા છે. માત્ર 32 વર્ષની નાની ઉંમરે દુનિયાને અલવિદા કહેનાર અનુનય ભારતના સૌથી લોકપ્રિય અને પ્રેરણાદાયક ટ્રાવેલ કન્ટેન્ટ ક્રિએટર્સમાંના એક હતા.
દુબઈ: સોશિયલ મીડિયાની દુનિયામાંથી એક અત્યંત દુઃખદ સમાચાર સામે આવ્યા છે. જાણીતા ટ્રાવેલ ઇન્ફ્લુએન્સર અને ફોટોગ્રાફર અનુનય સૂદ (Anunay Sood)નું 32 વર્ષની વયે નિધન થયું છે. તેમના મૃત્યુની માહિતી તેમના સત્તાવાર ઇન્સ્ટાગ્રામ એકાઉન્ટ પરથી શેર કરવામાં આવી હતી, જેણે લાખો પ્રશંસકોને ઊંડા આઘાતમાં મૂકી દીધા.
ભારતથી લઈને દુબઈ સુધી, અનુનય સૂદ તેમના શાનદાર ટ્રાવેલ શૉટ્સ, સિનેમેટિક વીડિયોઝ અને પ્રેરણાદાયક વ્લોગ્સ માટે જાણીતા હતા. તેમના ઇન્સ્ટાગ્રામ પર 14 લાખથી વધુ ફોલોઅર્સ અને યુટ્યુબ ચેનલ પર 3.8 લાખ સબ્સ્ક્રાઇબર્સ હતા. માત્ર 32 વર્ષની ઉંમરે દુનિયાને અલવિદા કહી દેનાર અનુનય તેમના ફોલોઅર્સ માટે ફક્ત એક કન્ટેન્ટ ક્રિએટર જ નહીં, પરંતુ યાત્રાની પ્રેરણા હતા.
પરિવારે ઇન્સ્ટાગ્રામ પર પુષ્ટિ કરી
અનુનય સૂદના નિધનની પુષ્ટિ તેમના પરિવારે સત્તાવાર ઇન્સ્ટાગ્રામ પોસ્ટ દ્વારા કરી. પોસ્ટમાં લખવામાં આવ્યું હતું કે, “અત્યંત દુઃખ સાથે, અમે અમારા પ્રિય અનુનય સૂદના નિધનના સમાચાર શેર કરી રહ્યા છીએ. આ મુશ્કેલ સમયમાં અમે સૌને વિનંતી કરીએ છીએ કે અમારી ગોપનીયતાનો આદર કરો અને કોઈપણ પ્રકારની અટકળો કે અફવાઓથી બચો. કૃપા કરીને અનુનયના પરિવાર અને પ્રિયજનોને તમારી પ્રાર્થનાઓમાં યાદ રાખો. તેમની આત્માને શાંતિ મળે.”
આ પોસ્ટ પછી સોશિયલ મીડિયા પર શ્રદ્ધાંજલિનો ધોધ ઉમટી પડ્યો. ચાહકો અને સાથી ઇન્ફ્લુએન્સર્સે તેમના માટે ભાવનાત્મક સંદેશા શેર કર્યા અને તેમના આકસ્મિક મૃત્યુ પર ઊંડો શોક વ્યક્ત કર્યો.
રહસ્યમય સંજોગોમાં મૃત્યુ
અનુનય સૂદના મૃત્યુનું કારણ હજુ સ્પષ્ટ થયું નથી. કેટલાક અહેવાલોમાં જણાવાયું છે કે તેમનું નિધન લાસ વેગાસ (Las Vegas) માં થયું હતું, પરંતુ ચોક્કસ સંજોગો વિશે તેમના પરિવારે કોઈ માહિતી શેર કરી નથી. ચાહકો સતત સોશિયલ મીડિયા પર સવાલો પૂછી રહ્યા છે કે, આખરે એવું શું થયું કે આટલી નાની ઉંમરે તેમણે દુનિયાને અલવિદા કહી દીધું? ઘણા લોકોનું કહેવું છે કે તેઓ સંપૂર્ણ સ્વસ્થ દેખાતા હતા, કારણ કે મૃત્યુના એક દિવસ પહેલા જ તેમણે એક અત્યંત એનર્જેટિક ટ્રાવેલ રીલ પોસ્ટ કરી હતી.
અનુનય સૂદની છેલ્લી ઇન્સ્ટાગ્રામ પોસ્ટ હવે તેમના ચાહકો માટે ભાવનાત્મક યાદગીરી બની ગઈ છે. મૃત્યુના એક દિવસ પહેલા તેમણે લાસ વેગાસની ઝગમગતી રોશનીઓ અને રેસિંગ કારોની વચ્ચેથી એક રીલ શેર કરી હતી, જેમાં તેમણે લખ્યું હતું કે, “મને હજી પણ વિશ્વાસ નથી આવતો કે મેં વીકેન્ડ દિગ્ગજો અને સપનાની મશીનોની વચ્ચે વિતાવ્યો.”
હવે આ જ વીડિયો તેમના ચાહકો માટે છેલ્લી સ્મિત બની ગયો છે. તેમનો છેલ્લો યુટ્યુબ વ્લોગ “સ્વિટ્ઝર્લેન્ડના છુપાયેલા પાસાની શોધ | એવી જગ્યાઓ જ્યાં પ્રવાસીઓ ક્યારેય જતા નથી” 3 નવેમ્બર 2025 ના રોજ અપલોડ થયો હતો. આ વીડિયોમાં તેઓ સ્વિટ્ઝર્લેન્ડના ઓછા જાણીતા વિસ્તારોને એક્સપ્લોર કરતા જોવા મળ્યા હતા — તે જ જુસ્સો, તે જ ઊર્જા, જેણે તેમને લાખો લોકોના પ્રિય બનાવ્યા હતા.
