ભારતની રાષ્ટ્રપતિ દ્રૌપદી મુર્મુ આજે નવી દિલ્હીના ઇન્દિરા ગાંધી ઇન્ડોર સ્ટેડિયમમાં દિલ્હી સરકારની ચાર જનકલ્યાણ યોજનાઓનું ઔપચારિક ઉદ્ઘાટન કરશે. કાર્યક્રમ દિલ્હી સરકારના એક વર્ષ પૂર્ણ થવાના પ્રસંગે યોજાઈ રહ્યો છે અને તેને “સશક્ત નારી, સમૃદ્ધ દિલ્હી” થીમ હેઠળ રજૂ કરવામાં આવ્યો છે.
કાર્યક્રમ અંતર્ગત મહિલાઓ માટે મફત બસ મુસાફરી માટે ‘પિંક સ્માર્ટ કાર્ડ’, હોળી અને દિવાળી પર મફત એલપિજિ ગેસ સિલિન્ડર, ‘દિલ્લી લખપતિ બિટિયા યોજના’ અને ‘મેરી પૂંજી મેરા અધિકાર યોજના’નો પ્રારંભ કરવામાં આવશે.
મહિલાઓ માટે ‘પિંક સ્માર્ટ કાર્ડ’ યોજના હેઠળ દિલ્હી નિવાસી મહિલાઓને જાહેર પરિવહનમાં મફત બસ મુસાફરી માટે કાર્ડ આપવામાં આવશે. મુખ્યમંત્રી રેખા ગુપ્તાના જણાવ્યા અનુસાર આ કાર્ડ દિલ્હી ટ્રાન્સપોર્ટ કોર્પોરેશન (DTC)ની બસોમાં નિઃશુલ્ક મુસાફરીની સુવિધા આપશે. કાર્ડને મેટ્રો, રિજનલ રેપિડ ટ્રાન્ઝિટ સિસ્ટમ (RRTS) અને અન્ય જાહેર પરિવહન સેવાઓના વર્તમાન ઓટોમેટિક ફેર કલેક્શન સિસ્ટમ સાથે એકીકૃત કરવામાં આવશે, જેથી મહિલાઓ એક જ કાર્ડ દ્વારા બહુવિધ પરિવહન સેવાઓનો લાભ લઈ શકે.
સરકાર અંદાજે 50 નિર્ધારિત કેન્દ્રો, જેમાં જિલ્લા મેજિસ્ટ્રેટ (DM) અને સબ-ડિવિઝનલ મેજિસ્ટ્રેટ (SDM) કચેરીઓ તેમજ પસંદ કરાયેલા DTC ડિપોનો સમાવેશ થાય છે, ત્યાં કાર્ડનું વિતરણ કરશે. કાર્ડ નિઃશુલ્ક જારી કરવામાં આવશે અને તેનો સંપૂર્ણ ખર્ચ દિલ્હી સરકાર ઉઠાવશે.
‘દિલ્લી લખપતિ બિટિયા યોજના’ હેઠળ હાલની સહાય યોજના પુનર્ગઠિત કરવામાં આવી છે. અગાઉની વ્યવસ્થા મુજબ પાત્ર બાળકીના જન્મ સમયે એકમુષ્ટ રકમ જમા કરવામાં આવતી હતી અને ધોરણ 1, 6 અને 9માં પ્રવેશ સમયે તેમજ ધોરણ 10 પાસ કર્યા બાદ અને ધોરણ 12માં પ્રવેશ સમયે વધારાની આર્થિક સહાય આપવામાં આવતી હતી.
નવી યોજનામાં સરકાર બાળકીના નામે વિવિધ તબક્કાઓમાં કુલ 56,000 રૂપિયા જમા કરશે. વ્યાજ સાથે આ રકમ 21 વર્ષની ઉંમરે પરિપક્વ થઈ એક લાખ રૂપિયાથી વધુ થવાની સંભાવના વ્યક્ત કરવામાં આવી છે. યોજનાનો હેતુ બાળકીના શિક્ષણને પ્રોત્સાહન આપવાનો અને પરિવારોને દીર્ઘકાલીન આર્થિક સહાય ઉપલબ્ધ કરાવવાનો છે.
રેશન કાર્ડ ધારક પરિવારોને દર વર્ષે હોળી અને દિવાળી પર બે મફત એલપિજિ સિલિન્ડર આપવામાં આવશે. મુખ્યમંત્રી રેખા ગુપ્તાના જણાવ્યા અનુસાર આ લાભ ડાયરેક્ટ બેનિફિટ ટ્રાન્સફર (DBT) પ્રણાલી મારફતે આપવામાં આવશે. સિલિન્ડરની વર્તમાન બજાર કિંમતના સમકક્ષ રકમ પરિવારના વડાના આધાર-લિંકડ બેંક ખાતામાં સીધી જમા કરવામાં આવશે.
સરકારી અંદાજ મુજબ આશરે 17.5 લાખ રેશન કાર્ડ ધારક પરિવારોને આ યોજનાનો લાભ મળશે.
‘મેરી પૂંજી મેરા અધિકાર’ કાર્યક્રમ હેઠળ દિલ્હી લાડલી યોજનાના પાત્ર લાભાર્થીઓને તેમની પરિપક્વતા રકમ આપવામાં આવશે. વર્ષ 2008માં શરૂ કરાયેલી લાડલી યોજનાનો હેતુ બાળકીના જન્મ અને શિક્ષણને પ્રોત્સાહન આપવાનો હતો. હવે 40,642 પાત્ર લાભાર્થીઓને કુલ 100.25 કરોડ રૂપિયા ડિજિટલ માધ્યમ દ્વારા તેમના આધાર-લિંકડ બેંક ખાતાઓમાં હસ્તાંતરિત કરવામાં આવશે. સરકારના જણાવ્યા મુજબ આ પ્રક્રિયા દ્વારા પારદર્શિતા, કાર્યક્ષમતા અને સીધો લાભ સુનિશ્ચિત કરવામાં આવશે.
