ભારતની ત્રણ મુખ્ય ટેલિકોમ કંપનીઓ – Airtel, Reliance Jio અને Vodafone Idea (Vi) – પોતાના ગ્રાહકોને સારી નેટવર્ક સુવિધાઓ આપવા માટે સતત નવા પ્લાન્સ અને ટેકનોલોજી પર કામ કરી રહી છે. પરંતુ સવાલ એ છે કે તમારા વિસ્તારમાં કઈ કંપનીનું નેટવર્ક સૌથી ઝડપી છે? હવે આ સવાલનો જવાબ મેળવવો પહેલા કરતાં સરળ બની ગયો છે. ટેલિકોમ કંપનીઓએ પોતાની વેબસાઇટ પર Network Coverage Maps ઉપલબ્ધ કરાવ્યા છે, જેની મદદથી ગ્રાહકો પોતાના વિસ્તારમાં સૌથી શ્રેષ્ઠ નેટવર્ક પસંદ કરી શકે છે.
TRAIના નવા નિર્દેશથી ગ્રાહકોને ફાયદો થશે
ભારતીય ટેલિકોમ નિયામક સત્તા મંડળ (TRAI) એ ટેલિકોમ કંપનીઓને નિર્દેશ આપ્યા હતા કે તેઓ પોતાના નેટવર્ક કવરેજની પારદર્શિતા જાળવી રાખે અને Geospatial Coverage Maps વેબસાઇટ પર જાહેર કરે. આ નિર્દેશ સુધારેલા ક્વોલિટી ઓફ સર્વિસ (QoS) નિયમો હેઠળ 1 ઓક્ટોબર 2024થી લાગુ થયો છે. આ પગલાનો મુખ્ય ઉદ્દેશ ગ્રાહકોને નેટવર્ક કવરેજ વિશે સચોટ માહિતી આપવાનો અને તેમને યોગ્ય નેટવર્ક પસંદ કરવામાં મદદ કરવાનો છે.
નેટવર્ક કવરેજ મેપ ક્યાં અને કેવી રીતે મળશે?
હવે ગ્રાહકો પોતાના વિસ્તારમાં 4G, 5G નેટવર્કની ઉપલબ્ધતા પોતે ચેક કરી શકે છે. ટેલિકોમ કંપનીઓએ પોતાની વેબસાઇટ પર આ સુવિધા ઉપલબ્ધ કરાવી છે:
• Airtel – Check Coverage સેક્શનમાં જઈને નેટવર્ક કવરેજ જોઈ શકાય છે. (લિંક: airtel.in/wirelesscoverage)
• Reliance Jio – Coverage Map સેક્શન દ્વારા ગ્રાહકો પોતાના વિસ્તારમાં Jioનું 4G, 5G નેટવર્ક જોઈ શકે છે. (લિંક: jio.com/selfcare/coverage-map)
• Vodafone Idea (Vi) – Network Coverage સેક્શનમાં જઈને Vi નેટવર્કની ઉપલબ્ધતાની માહિતી મેળવી શકાય છે. (લિંક: myvi.in/vicoverage)
• BSNL – હાલમાં, BSNLએ પોતાની વેબસાઇટ પર આવો કોઈ નેટવર્ક કવરેજ મેપ ઉપલબ્ધ કરાવ્યો નથી.
તમારા વિસ્તારમાં નેટવર્ક કવરેજ કેવી રીતે ચેક કરવું?
• Airtel: ગ્રાહકોએ Check Coverage સેક્શનમાં જઈને પોતાનો પિન કોડ નાખવો પડશે, જેથી તેઓ 2G, 4G અને 5G કવરેજ જોઈ શકશે. જોકે, કેટલાક ગ્રાહકોને આ ફીચરનો ઉપયોગ કરવામાં મુશ્કેલી પડી રહી છે.
• Jio: Jio ગ્રાહકો Coverage Mapમાં જઈને પોતાનો સરનામો અથવા પિન કોડ નાખીને જોઈ શકે છે કે તેમના વિસ્તારમાં 4G, 5G અથવા 4G+5G નેટવર્ક કેટલું મજબૂત છે. Jioનો મેપ છેલ્લે 1 માર્ચ 2025ના રોજ અપડેટ કરવામાં આવ્યો હતો.
• Vi: Viના નેટવર્ક મેપમાં 2G, 4G અને 5G કવરેજ જોવાનો વિકલ્પ આપવામાં આવ્યો છે, જેથી ગ્રાહકો પોતાના વિસ્તારમાં નેટવર્ક સ્ટ્રેન્થની ચકાસણી કરી શકે છે.
TRAIના આ પગલાથી શું ફાયદો થશે?
TRAIના આ નિર્દેશથી ગ્રાહકોને નક્કી કરવામાં સરળતા રહેશે કે તેમના વિસ્તારમાં કયું નેટવર્ક સૌથી સારું પરફોર્મ કરી રહ્યું છે. આનાથી તેઓ સારી કનેક્ટિવિટી પસંદ કરીને કોલ ડ્રોપ, ધીમી ઈન્ટરનેટ અને નેટવર્ક સમસ્યાઓથી બચી શકશે. આ ઉપરાંત, આનાથી ટેલિકોમ કંપનીઓ પર પણ સારી સેવા આપવાનું દબાણ રહેશે.
જો તમે પણ તમારા વિસ્તારમાં નેટવર્કની સ્પીડને લઈને ચિંતિત છો, તો ઉપર જણાવેલી રીતે તમારા વિસ્તારનું નેટવર્ક કવરેજ ચેક કરી શકો છો અને જરૂર પડ્યે સારો ઓપરેટર પસંદ કરી શકો છો.
