કોલ ઈન્ડિયા લિમિટેડે મેનેજમેન્ટ ટ્રેઇની (MT) પદો માટે ભરતી પ્રક્રિયાની જાહેરાત કરી છે. આ ભરતી અભિયાન હેઠળ કુલ 660 ખાલી જગ્યાઓ ભરવામાં આવશે. લાયક ઉમેદવારો 12 મે 2026થી સત્તાવાર વેબસાઇટ coalindia.in પર જઈને ઓનલાઈન અરજી કરી શકશે.
કોલ ઈન્ડિયા લિમિટેડ દ્વારા મેનેજમેન્ટ ટ્રેઇનીના કુલ 660 પદો માટે ભરતી કરવામાં આવશે. તેમાં ઇલેક્ટ્રિકલ, સિવિલ, મિકેનિકલ, સિસ્ટમ, ઇલેક્ટ્રોનિક્સ એન્ડ કમ્યુનિકેશન, જિયોલોજી, ઇન્ડસ્ટ્રીયલ એન્જિનિયરિંગ, રાજભાષા અને કંપની સેક્રેટરી જેવી સ્ટ્રીમનો સમાવેશ થાય છે. સૌથી વધુ 221 પદ ઇલેક્ટ્રિકલ અને 178 પદ સિવિલ સ્ટ્રીમ માટે નિર્ધારિત કરવામાં આવ્યા છે.
આ ભરતી માટે અરજી કરવા ઉમેદવાર પાસે સંબંધિત સ્ટ્રીમમાં B.E., B.Tech, B.Sc (Engg.), MCA, M.Sc, M.Tech અથવા CS જેવી ડિગ્રી હોવી જરૂરી છે. ઉમેદવારની મહત્તમ વય મર્યાદા 30 વર્ષ નક્કી કરવામાં આવી છે. વયની ગણતરી 30 એપ્રિલ 2026ના આધારે કરવામાં આવશે. અનામત વર્ગના ઉમેદવારોને સરકારી નિયમો અનુસાર વય મર્યાદામાં છૂટ આપવામાં આવશે.
અરજી કરવા માટે ઉમેદવારોએ સૌપ્રથમ કોલ ઈન્ડિયાની સત્તાવાર વેબસાઇટ coalindia.in પર જવું પડશે. ત્યારબાદ ભરતી લિંક પર ક્લિક કરીને ઓનલાઈન રજિસ્ટ્રેશન કરવાનું રહેશે. રજિસ્ટ્રેશન પૂર્ણ થયા બાદ ઉમેદવારો અરજી ફોર્મ ભરી જરૂરી દસ્તાવેજો અપલોડ કરી શકશે અને નિર્ધારિત અરજી ફી જમા કરાવવાની રહેશે.
જનરલ અને OBC વર્ગના ઉમેદવારોને અરજી ફી તરીકે 1180 રૂપિયા જમા કરાવવા પડશે. જ્યારે SC, ST અને PH વર્ગના ઉમેદવારોને અરજી ફીમાંથી મુક્તિ આપવામાં આવી છે.
ભરતી માટે પસંદગી કમ્પ્યુટર બેઝ્ડ ટેસ્ટ (CBT) દ્વારા કરવામાં આવશે. પરીક્ષા બે પેપરમાં યોજાશે અને ઉમેદવારોને તેને પૂર્ણ કરવા માટે કુલ 3 કલાકનો સમય આપવામાં આવશે. પરીક્ષામાં દરેક પ્રશ્ન 1 ગુણનો રહેશે અને તેમાં નેગેટિવ માર્કિંગ રાખવામાં આવ્યું નથી.
