ભારત અને ઇંગ્લેન્ડ વચ્ચે બુધવારે રમાયેલા મહિલા ટી20 વર્લ્ડ કપના અંતિમ અભ્યાસ મેચમાં ઇંગ્લેન્ડે પાંચ રને જીત મેળવી. 172 રનના લક્ષ્યનો પીછો કરતી ભારતીય ટીમ 19.5 ઓવરમાં 166 રને ઓલઆઉટ થઈ ગઈ.
ટોસ હારીને પ્રથમ બેટિંગ કરવા ઉતરેલી ઇંગ્લેન્ડની ટીમે સંતુલિત શરૂઆત કરી. ઓપનર એમી જોન્સે 45 બોલમાં 64 રનની ઇનિંગ્સ રમી, જ્યારે કેપ્ટન નેટ સ્કિવર-બ્રન્ટે 45 બોલમાં 57 રન બનાવી ટીમને મજબૂત સ્થિતિમાં પહોંચાડી.
બંને વચ્ચે 70 રનની મહત્વપૂર્ણ ભાગીદારી થઈ. મધ્ય ઓવરોમાં ભારતીય બોલરોએ રનગતિ પર નિયંત્રણ મેળવ્યું હતું, પરંતુ અંતિમ ઓવરોમાં ડેનિયલ ગિબ્સનની ઝડપી બેટિંગે મેચનો રંગ બદલી નાખ્યો. ગિબ્સને માત્ર 12 બોલમાં અણનમ 30 રન બનાવ્યા, જેમાં અંતિમ ઓવરમાં રેણુકા સિંહ સામે બનાવેલા 19 રનનો સમાવેશ થાય છે. આ ઝડપી અંતના કારણે ઇંગ્લેન્ડે 6 વિકેટે 171 રન બનાવ્યા.
ભારત તરફથી શ્રેયંકા પાટિલે 2 વિકેટ ઝડપી હતી. રેણુકા સિંહ, શ્રી ચરણી, રાધા યાદવ અને શેફાલી વર્માને એક-એક વિકેટ મળી હતી.
172 રનના લક્ષ્યનો પીછો કરતી ભારતીય ટીમની શરૂઆત ફરી એકવાર નબળી રહી. સ્મૃતિ મંધાના માત્ર 1 રન બનાવી આઉટ થઈ ગઈ હતી. શેફાલી વર્માએ 13 રનની ઇનિંગ્સ રમી, પરંતુ તે મોટી ઇનિંગ્સમાં ફેરવી શકી નહોતી.
કેપ્ટન હરમનપ્રીત કૌરે 17 રન બનાવ્યા, પરંતુ મધ્યક્રમ પણ અસરકારક સાબિત થયો નહોતો. સતત વિકેટો પડતાં ભારત 17.3 ઓવરમાં 132/7ના સ્કોર પર સંઘર્ષ કરી રહ્યું હતું.
મેચનો સૌથી મહત્વપૂર્ણ તબક્કો ત્યારે આવ્યો જ્યારે રિચા ઘોષે આક્રમક બેટિંગ કરીને ભારતને જીતની નજીક પહોંચાડ્યું. રિચાએ માત્ર 36 બોલમાં 68 રન બનાવ્યા. તેમની ઇનિંગ્સના કારણે ભારત ફરી મેચમાં પરત આવ્યું, પરંતુ અંતિમ ક્ષણોમાં ટીમ લક્ષ્ય સુધી પહોંચી શકી નહોતી.
ભારતને અંતિમ ત્રણ બોલમાં 6 રનની જરૂર હતી ત્યારે રિચા સ્ટમ્પ આઉટ થઈ ગઈ હતી. ત્યારબાદની જ બોલ પર રેણુકા સિંહ આઉટ થતાં ભારતની ઇનિંગ્સ 166 રને સમાપ્ત થઈ ગઈ.
ઇંગ્લેન્ડ તરફથી ડાબોડી સ્પિનર લિન્સી સ્મિથે 42 રન આપી 3 વિકેટ ઝડપી હતી. ચાર્લી ડીન અને ટિલી કોર્ટેન-કોલમને પણ 2-2 વિકેટ લઈને ભારતીય મધ્યક્રમને નુકસાન પહોંચાડ્યું.
