ભારતીય મહિલા ક્રિકેટ ટીમે આઈસીસી મહિલા ટી20 વર્લ્ડ કપ 2026માં પોતાના અભિયાનની મજબૂત શરૂઆત કરી છે. ગ્રુપ-એની બહુપ્રતીક્ષિત મેચમાં ભારતે પાકિસ્તાનને 64 રને હરાવીને મહત્વના બે પોઈન્ટ મેળવ્યા.
પ્રથમ બેટિંગ કરતાં ભારતે નિર્ધારિત 20 ઓવરમાં 6 વિકેટે 170 રન બનાવ્યા હતા. તેના જવાબમાં પાકિસ્તાનની ટીમ ભારતીય બોલરો સામે ટકી શકી નહોતી અને 17 ઓવરમાં 106 રને ઓલઆઉટ થઈ ગઈ.
ભારતની શરૂઆત અપેક્ષા મુજબ રહી નહોતી. ઓપનર શેફાલી વર્મા 6 રન બનાવી આઉટ થઈ ગઈ હતી, જ્યારે જેમિમા રોડ્રિગ્સ માત્ર 1 રન બનાવી પેવેલિયન પરત ફરી હતી. શરૂઆતના ઝટકાઓ બાદ ટીમનો સ્કોર 18 રને 2 વિકેટ હતો. આવી સ્થિતિમાં સ્મૃતિ મંધાના અને કેપ્ટન હરમનપ્રીત કૌરે જવાબદારી સંભાળી હતી. બંનેએ ત્રીજી વિકેટ માટે 91 રનની મહત્વપૂર્ણ ભાગીદારી કરીને ભારતીય ઇનિંગ્સને મજબૂત આધાર આપ્યો હતો.
મંધાનાએ 44 બોલમાં 68 રન બનાવ્યા હતા. તેમની ઇનિંગ્સમાં 9 ચોગ્ગા અને 2 છગ્ગાનો સમાવેશ થયો હતો. બીજી તરફ હરમનપ્રીત કૌરે 35 બોલમાં 36 રનની ઉપયોગી ઇનિંગ્સ રમી હતી.
ઇનિંગ્સના અંતિમ ઓવરોમાં વિકેટકીપર બેટર ઋચા ઘોષે આક્રમક બેટિંગ કરી હતી. તેમણે માત્ર 17 બોલમાં 34 રન બનાવ્યા હતા, જેમાં 5 ચોગ્ગા અને 1 છગ્ગાનો સમાવેશ થયો હતો. ઓલરાઉન્ડર દીપ્તિ શર્માએ પણ અણનમ 12 રન ઉમેર્યા હતા, જેના કારણે ભારતનો સ્કોર 170 સુધી પહોંચ્યો હતો. પાકિસ્તાન તરફથી કેપ્ટન ફાતિમા સના અને સાદિયા ઇકબાલે 2-2 વિકેટ લીધી હતી, જ્યારે તસ્મિયા રૂબાબ અને રમીન શમીમને 1-1 સફળતા મળી હતી.
171 રનના લક્ષ્યનો પીછો કરવા ઉતરેલી પાકિસ્તાનની ટીમે સકારાત્મક શરૂઆત કરી હતી. મુનીબા અલી અને ગુલ ફિરોઝાએ પ્રથમ વિકેટ માટે 38 રનની ભાગીદારી કરીને ટીમને સારી સ્થિતિમાં પહોંચાડી હતી. મુનીબા અલીએ 35 બોલમાં 41 રનની ઇનિંગ્સ રમી હતી, જેમાં 5 ચોગ્ગાનો સમાવેશ થયો હતો.
જોકે, પાવરપ્લે બાદ ભારતીય બોલરોએ વાપસી કરતાં મેચનું ચિત્ર બદલી નાખ્યું હતું. પાકિસ્તાનની ટીમ સતત અંતરે વિકેટ ગુમાવતી રહી હતી અને કોઈ પણ બેટર મોટી ભાગીદારી બનાવી શક્યો નહોતો. આલિયા રિયાઝે 18 રન બનાવ્યા હતા, પરંતુ તેમને બીજા છેડેથી પૂરતો સાથ મળ્યો નહોતો. કેપ્ટન ફાતિમા સના ખાતું ખોલાવ્યા વિના આઉટ થઈ ગઈ હતી.
ભારતની જીતમાં ઓલરાઉન્ડર દીપ્તિ શર્માએ મહત્વપૂર્ણ ભૂમિકા ભજવી હતી. તેમણે 4 ઓવરમાં માત્ર 10 રન આપીને 5 વિકેટ ઝડપી હતી અને પાકિસ્તાનની બેટિંગને સંપૂર્ણપણે ખોરવી નાખી હતી. દીપ્તિએ ગુલ ફિરોઝા, આયશા જફર, આલિયા રિયાઝ, નશરા સંધૂ અને તસ્મિયા રૂબાબને આઉટ કર્યા હતા, જેના કારણે ભારતે મેચ પર મજબૂત પકડ બનાવી હતી. તેમનો આ સ્પેલ મહિલા ટી20 વર્લ્ડ કપના ઇતિહાસના યાદગાર બોલિંગ પ્રદર્શનમાંથી એક રહ્યો.
યુવા સ્પિનર શ્રી ચરણી એ પણ મહત્વપૂર્ણ યોગદાન આપ્યું હતું. તેમણે 4 ઓવરમાં 21 રન આપીને 3 વિકેટ ઝડપી હતી. જ્યારે શેફાલી વર્માએ પણ 1 વિકેટ મેળવી હતી.
