અફઘાનિસ્તાન પ્રીમિયર લીગ (APL) 2026ના પ્લેયર ડ્રાફ્ટમાં પાકિસ્તાનના ભૂતપૂર્વ ઝડપી બોલર મોહમ્મદ આમિર પ્રથમ પસંદગી બન્યા છે. કંધાર વૉરિયર્સે પ્લેટિનમ કેટેગરીમાં તેમને પોતાની ટીમમાં સામેલ કર્યા છે. તેમની ફી 1 લાખ અમેરિકન ડૉલર એટલે કે અંદાજે 89 લાખ રૂપિયા નક્કી કરવામાં આવી છે.
અફઘાનિસ્તાન પ્રીમિયર લીગ 2026 માટે મંગળવાર, 3 નવેમ્બરના રોજ દુબઈમાં ખેલાડીઓનો ડ્રાફ્ટ યોજાયો હતો. આ ડ્રાફ્ટમાં સૌથી પહેલાં પાકિસ્તાનના ભૂતપૂર્વ ઝડપી બોલર મોહમ્મદ આમિરની પસંદગી કરવામાં આવી હતી. કંધાર વૉરિયર્સે તેમને પોતાની પ્રથમ પસંદગી બનાવ્યા હતા.
આમિરને સૌથી મોંઘી પ્લેટિનમ કેટેગરીમાં સ્થાન મળ્યું છે. આ કેટેગરી માટે 1 લાખ અમેરિકન ડૉલરની ફી નક્કી કરવામાં આવી છે, જે ભારતીય ચલણમાં આશરે 89 લાખ રૂપિયા થાય છે.
આમિર બાદ કંધાર વૉરિયર્સે અફઘાનિસ્તાનના અનુભવી ઓલરાઉન્ડર મોહમ્મદ નબીની પસંદગી કરી હતી. નબી ડાયમંડ કેટેગરીમાં સામેલ છે. ટીમમાં રાશિદ ખાન પહેલેથી જ અફઘાન આઇકન ખેલાડી તરીકે જોડાયેલા છે. આ રીતે કંધારની ટીમમાં રાશિદ ખાન, મોહમ્મદ નબી અને મોહમ્મદ આમિર જેવા અનુભવી ખેલાડીઓ સામેલ થશે.
અફઘાનિસ્તાન પ્રીમિયર લીગમાં ખેલાડીઓની ફી તેમની ડ્રાફ્ટ કેટેગરીના આધારે નક્કી કરવામાં આવી છે. પ્લેટિનમ કેટેગરી સૌથી મોંઘી છે, જેમાં ખેલાડીઓને 1 લાખ ડૉલર મળશે. ત્યારબાદ ડાયમંડ કેટેગરીમાં 65 હજાર ડૉલર અને ગોલ્ડ કેટેગરીમાં 40 હજાર ડૉલરની ફી નક્કી કરવામાં આવી છે.
સિલ્વર કેટેગરીના ખેલાડીઓને 20 હજાર ડૉલર મળશે, જ્યારે ઇમર્જિંગ કેટેગરીમાં સામેલ યુવા ક્રિકેટરો માટે 10 હજાર ડૉલર નક્કી કરવામાં આવ્યા છે. ડ્રાફ્ટમાં સપ્લિમેન્ટરી રાઉન્ડની પણ વ્યવસ્થા રાખવામાં આવી હતી.
આ વખતે કુલ 462 ખેલાડીઓને ડ્રાફ્ટ માટે શોર્ટલિસ્ટ કરવામાં આવ્યા હતા. તેમાંથી 90 ખેલાડીઓની પસંદગી કરવામાં આવી છે. પાંચેય ફ્રેન્ચાઇઝીએ પોતાની 19-19 ખેલાડીઓની ટીમ તૈયાર કરી છે. દરેક ટીમમાં સ્થાનિક ક્રિકેટરોની સાથે વિદેશી ખેલાડીઓને પણ સામેલ કરવાની વ્યવસ્થા છે.
મોહમ્મદ આમિરની પસંદગીની સાથે તેમની નાગરિકતા પણ ચર્ચાનો વિષય બની છે. પાકિસ્તાન માટે આંતરરાષ્ટ્રીય ક્રિકેટ રમી ચૂકેલા આમિરે મે 2026માં બ્રિટિશ નાગરિકતા મેળવી હતી. ત્યારબાદ તેઓ ઇંગ્લેન્ડની સ્થાનિક ક્રિકેટ સ્પર્ધાઓમાં સ્થાનિક ખેલાડી તરીકે રમવા લાગ્યા હતા.
આમિર ટી20 બ્લાસ્ટ અને ધ હન્ડ્રેડ જેવી સ્પર્ધાઓમાં ભાગ લઈ ચૂક્યા છે. અફઘાનિસ્તાન પ્રીમિયર લીગના ડ્રાફ્ટમાં પણ તેમણે બ્રિટિશ નાગરિક તરીકે પોતાનું રજિસ્ટ્રેશન કરાવ્યું હતું.
આ કારણે તેમની સ્થિતિ પાકિસ્તાનના અન્ય ખેલાડીઓથી અલગ છે. આમિરને પાકિસ્તાન ક્રિકેટ બોર્ડ (PCB) પાસેથી નો ઓબ્જેક્શન સર્ટિફિકેટ (NOC) લેવાની જરૂર નથી, જ્યારે પાકિસ્તાન માટે રમતા અન્ય ક્રિકેટરો સામે આ મંજૂરી મેળવવાનો પ્રશ્ન ઊભો છે.
અફઘાનિસ્તાન પ્રીમિયર લીગ માટે 30થી વધુ પાકિસ્તાની ખેલાડીઓએ પોતાનાં નામ નોંધાવ્યાં હતાં. તેમાં ફખર જમાન, સૈમ અયૂબ, હસન અલી, શાન મસૂદ, અબ્દુલ્લા શફીક અને ઇમાદ વસીમ જેવા ખેલાડીઓનાં નામ સામેલ છે.
જોકે, આ ખેલાડીઓ લીગમાં ભાગ લઈ શકશે કે નહીં તે અંગે સ્થિતિ સ્પષ્ટ નથી. અહેવાલો અનુસાર, પાકિસ્તાન ક્રિકેટ બોર્ડ તરફથી NOC મળવાની શક્યતા ઓછી છે. અફઘાનિસ્તાન ક્રિકેટ બોર્ડે પણ સ્પષ્ટ કર્યું છે કે પાકિસ્તાની ખેલાડીઓએ પોતાની ક્રિકેટ સંસ્થા પાસેથી જરૂરી મંજૂરી મેળવવી પડશે.
જો NOC નહીં મળે તો આ ખેલાડીઓ માટે ટૂર્નામેન્ટમાં ભાગ લેવો મુશ્કેલ બની શકે છે. બીજી તરફ, બ્રિટિશ નાગરિકતા ધરાવતા હોવાને કારણે મોહમ્મદ આમિર સામે આવી કોઈ અડચણ નથી.
અફઘાનિસ્તાન પ્રીમિયર લીગમાં બ્રિટિશ નાગરિક તરીકે મોહમ્મદ આમિરનું નામ સામે આવ્યા બાદ તેમના IPLમાં રમવા અંગે પણ ચર્ચા શરૂ થઈ હતી. એવા અહેવાલો આવ્યા હતા કે તેઓ IPL 2027ની હરાજીમાં વિદેશી ખેલાડી તરીકે પોતાનું રજિસ્ટ્રેશન કરાવી શકે છે.
જોકે, આમિરે આ અટકળોને ફગાવી દીધી હતી. તેમણે સોશિયલ મીડિયા પર સ્પષ્ટ કર્યું હતું કે IPL અંગે ચાલી રહેલા અહેવાલો સાચા નથી. ત્યારબાદ તેમના IPLમાં રમવા અંગેની ચર્ચા પર હાલ પૂરતો વિરામ લાગી ગયો છે.
અફઘાનિસ્તાન પ્રીમિયર લીગની નવી સિઝન 27 ડિસેમ્બર 2026થી સંયુક્ત આરબ અમીરાત (UAE)માં શરૂ થવાની છે. આ ટૂર્નામેન્ટમાં કંધાર વૉરિયર્સ, ટીમ બલ્ખ, નંગરહાર કોસ્મિક, અકસેલ યુનાઇટેડ કાબુલ અને ટીમ પક્તિયા ભાગ લેશે.
