યુનાઇટેડ નેશન્સ સિક્યુરિટી કાઉન્સિલની 1267 પ્રતિબંધ દેખરેખ સમિતિની તાજી રિપોર્ટમાં દિલ્હીના ઐતિહાસિક લાલ કિલ્લા પર થયેલા આતંકી હુમલાનો સમાવેશ કરવામાં આવ્યો છે અને તેમાં પાકિસ્તાનમાં સક્રિય આતંકી સંગઠન જૈશ-એ-મોહમ્મદનો સીધો સંબંધ દર્શાવવામાં આવ્યો છે. રિપોર્ટ મુજબ આ નોંધ પ્રથમ વખત સત્તાવાર રીતે કરવામાં આવી છે.
રિપોર્ટમાં જણાવાયું છે કે જૈશ-એ-મોહમ્મદ ભારત વિરુદ્ધ આતંકી પ્રવૃત્તિઓમાં સંકળાયેલ રહ્યું છે અને પોતાના નેટવર્ક તથા પ્રભાવને સતત મજબૂત કરવાનો પ્રયાસ કરી રહ્યું છે. રિપોર્ટ અનુસાર છેલ્લા વર્ષોમાં સંગઠને અનેક આતંકી હુમલાઓની જવાબદારી લીધી હોવાનું પણ ઉલ્લેખિત છે.
એક સભ્ય દેશ દ્વારા આપવામાં આવેલી માહિતીના આધારે રિપોર્ટમાં નોંધાયું છે કે 9 નવેમ્બરે લાલ કિલ્લા પર થયેલા હુમલામાં જૈશ-એ-મોહમ્મદનો સીધો જોડાણ હતો. આ હુમલામાં 15 લોકોના મોત થયા હતા.
રિપોર્ટમાં એ પણ જણાવાયું છે કે જૈશ-એ-મોહમ્મદ પરંપરાગત આતંકી માળખાથી આગળ વધી પોતાની શક્તિ વધારવા નવા માર્ગો અપનાવી રહ્યું છે. 8 ઓક્ટોબરે જૈશ-એ-મોહમ્મદના પ્રમુખ મૌલાના મસૂદ અઝહર અલવી દ્વારા “જમાત-ઉલ-મુમિનાત” નામની મહિલા-માત્ર વિંગની રચનાની સત્તાવાર જાહેરાત કરવામાં આવી હતી. રિપોર્ટ મુજબ આ વિંગનો હેતુ આતંકી પ્રવૃત્તિઓને લોજિસ્ટિક સપોર્ટ પૂરું પાડવો અને સંગઠનની પહોંચ વધારવાનો છે.
રિપોર્ટમાં જૈશ-એ-મોહમ્મદનો સમાવેશ કરવામાં આવતા પાકિસ્તાનએ સત્તાવાર આપત્તિ નોંધાવી હતી અને જણાવ્યું હતું કે જૈશ-એ-મોહમ્મદ હવે નિષ્ક્રિય છે અને તેનો કોઈ સક્રિય નેટવર્ક હાજર નથી. અન્ય સભ્ય દેશોએ આ દાવો સ્વીકાર્યો નહોતો અને રિપોર્ટમાં જૈશ-એ-મોહમ્મદનો ઉલ્લેખ યથાવત રાખવામાં આવ્યો હતો.
રિપોર્ટમાં બલોચિસ્તાન લિબરેશન આર્મી (BLA) મુદ્દે પણ ઉલ્લેખ કરવામાં આવ્યો છે. પાકિસ્તાને BLAને તહરીક-એ-તાલિબાન પાકિસ્તાન સાથે જોડીને તેને અલ-કાયદા અથવા ISIL જેવા સંગઠનો સાથે સંબંધિત બતાવવાનો પ્રયાસ કર્યો હતો અને તેને 1267 પ્રતિબંધ યાદીમાં સામેલ કરવાની માંગ કરી હતી. રિપોર્ટમાં આ દલીલ સ્વીકારવામાં આવી નથી.
રિપોર્ટ મુજબ કેટલાક સભ્ય દેશોનું માનવું છે કે BLAનો અલ-કાયદા અથવા ISIL સાથે કોઈ સીધો સંબંધ નથી. જોકે રિપોર્ટમાં એ માન્ય રાખવામાં આવ્યું છે કે BLAએ ચીન-પાકિસ્તાન આર્થિક કોરિડોર સાથે જોડાયેલા એક કાફલા પર ઘાતકી હુમલો કર્યો હતો, જેમાં 32 પાકિસ્તાની સૈનિકોના મોત થયા હતા. તેમ છતાં રિપોર્ટમાં સ્પષ્ટ કરવામાં આવ્યું છે કે BLAને વૈશ્વિક આતંકી સંગઠનો સાથે જોડવા પૂરતા પુરાવા ઉપલબ્ધ નથી.
