RBI એ UPI દ્વારા P2M પેમેન્ટની લિમિટ વધારી, હવે ગ્રાહકો ટેક્ષ, વીમા, હોસ્પિટલ, IPO વગેરે માટે ₹5 લાખ સુધીનું ડિજિટલ પેમેન્ટ કરી શકશે, વેપારીઓને ફાયદો.
નવી દિલ્હી – ભારતીય રિઝર્વ બેન્ક (RBI) એ ડિજિટલ પેમેન્ટ્સને પ્રોત્સાહન આપવા માટે UPI (Unified Payments Interface) સાથે જોડાયેલી એક મોટી જાહેરાત કરી છે. હવે P2M (Person-to-Merchant) વ્યવહારો માટે ચુકવણી મર્યાદા વધારવાની મંજૂરી આપવામાં આવી છે, જેથી ગ્રાહકો UPI દ્વારા મોટી રકમનું પેમેન્ટ કરી શકશે.
હવે મોટી ખરીદી માટે પણ UPI સરળ બનશે
RBI ગવર્નર સંજય મલ્હોત્રાએ નાણાકીય નીતિ સમીક્ષા દરમિયાન જણાવ્યું કે હવે ગ્રાહકો પૂંજી બજાર, વીમા અને અન્ય ક્ષેત્રોમાં ₹2 લાખ સુધી અને ટેક્ષ, હોસ્પિટલ, શિક્ષણ, IPO જેવા મામલાઓમાં ₹5 લાખ સુધીની રકમનું વ્યવહાર UPI દ્વારા કરી શકશે. આ પહેલાં આ ક્ષેત્રોમાં પણ મર્યાદા ₹2 લાખ હતી, જે હવે ખાસ કિસ્સાઓમાં વધારવામાં આવી છે.
P2P લિમિટમાં કોઈ ફેરફાર નહીં
જોકે, વ્યક્તિથી વ્યક્તિ (P2P) વ્યવહારો માટે હાલની ₹1 લાખની મર્યાદામાં કોઈ ફેરફાર કરવામાં આવ્યો નથી. આ સુવિધા ફક્ત P2M ટ્રાન્ઝેક્શન્સ માટે જ લાગુ પડશે, જેથી રિટેલર અને નાના વેપારીઓ પણ હવે મોટા ટ્રાન્ઝેક્શન ડિજિટલ રીતે કરી શકશે.
વેપારીઓ અને ગ્રાહકોને થશે લાભ
આ નિર્ણયથી માત્ર વેપારી વર્ગને જ સુવિધા મળશે નહીં, પરંતુ ગ્રાહકો માટે પણ હવે ઘરેણાં, મોંઘા ઇલેક્ટ્રોનિક્સ અથવા આરોગ્ય સેવાઓ જેવી ઉચ્ચ ખર્ચાળ સેવાઓ અને ઉત્પાદનોની ખરીદી UPI દ્વારા શક્ય બનશે. આનાથી રોકડ વ્યવહારોમાં ઘટાડો થશે અને ડિજિટલ અર્થતંત્રને મજબૂતી મળશે.
NPCI ને મળી લિમિટ નક્કી કરવાની છૂટ
RBI મુજબ, ભવિષ્યમાં વધતી જરૂરિયાતોને ધ્યાનમાં રાખીને NPCI (National Payments Corporation of India) અન્ય સ્ટેકહોલ્ડર્સ સાથે મળીને UPIની લિમિટમાં ફેરફાર કરી શકે છે. બેન્કોને પણ NPCI દ્વારા નક્કી કરવામાં આવેલી લિમિટ હેઠળ પોતાની ઇનહાઉસ લિમિટ નક્કી કરવાની છૂટ રહેશે.
