महाराष्ट्राचे उपमुख्यमंत्री आणि राष्ट्रवादी काँग्रेस पक्षाचे नेते अजित पवार यांचे खासगी विमान बारामती येथे लँडिंगदरम्यान कोसळले. या दुर्घटनेत सहा जणांचा मृत्यू झाल्याची माहिती देण्यात आली आहे. नागरी उड्डयन महासंचालनालयाने (DGCA) अपघाताची चौकशी सुरू केली असून प्रशासनाकडून मदत व बचाव कार्य सुरू आहे.
मिळालेल्या माहितीनुसार, अजित पवार बुधवारी सकाळी मुंबईहून बारामतीकडे रवाना झाले होते. हे VSR कंपनीचे खासगी विमान होते. बारामती येथे उतरण्याच्या प्रक्रियेदरम्यान विमान कोसळले. DGCA ने मृतांची संख्या सहा असल्याची पुष्टी केली आहे.
अपघातावेळी विमानात कोणकोण होते याची माहिती प्रशासन संकलित करत आहे. प्राथमिक माहितीनुसार, सुनेत्रा पवार, सुप्रिया सुळे आणि पार्थ पवार दिल्लीहून बारामतीकडे रवाना होणार होते.
पुणे ग्रामीण पोलिसांच्या वरिष्ठ अधिकाऱ्यांनी सांगितले की, अपघातानंतर अजित पवार यांना गंभीर दुखापत झाली होती. त्यांना तातडीने प्राथमिक उपचारासाठी नेण्यात आले, मात्र गंभीर दुखापतींमुळे त्यांचे निधन झाले. पुणे ग्रामीण पोलिस अधीक्षकांनी घटनास्थळी अधिकारी पाठवून बचाव कार्याला प्राधान्य दिले.
अपघाताच्या वेळी विमानात किती प्रवासी होते आणि कोण सुरक्षित आहेत याबाबत वेगवेगळी माहिती समोर आली आहे. प्राथमिक अहवालानुसार सहा जणांचा मृत्यू झाला असून काही प्रवासी जखमी झाल्याचेही नमूद करण्यात आले आहे. एनडीआरएफ, स्थानिक प्रशासन आणि पोलिसांकडून मदत व बचाव कार्य वेगाने सुरू आहे.
या दुर्घटनेमुळे बारामती येथे होणारी अजित पवार यांची सभा स्थगित करण्यात आली. DGCA ने सांगितले की, अपघाताच्या कारणांचा शोध घेण्यासाठी तांत्रिक पथक घटनास्थळी पाठवण्यात आले आहे. बारामती आणि परिसरात सुरक्षाव्यवस्था वाढवण्यात आली असून रस्ते बंद करून आपत्कालीन सेवांना सतर्क राहण्याचे निर्देश देण्यात आले आहेत.
