गुरुग्रामच्या टेनिस प्रशिक्षक राधिका यादवची हत्या तिच्या वडिलांनी केली. गुन्हा कबूल करूनही, हत्येचं कारण स्पष्ट नाही. ग्रामस्थांचे टोमणे किंवा कमाईशी संबंधित कारणही संशयास्पद आहे.
राधिका यादव हत्या प्रकरण: राधिका यादवच्या हत्येने सर्वांनाच हादरवून सोडले आहे. याप्रकरणी आरोपी वडील दीपक यादव याने गुन्हा कबूल केला आहे. त्याने गोळी झाडून मुलीची हत्या केली आणि आता न्यायालयात फाशीची मागणी करत आहे. पण या हत्येमागचं खरं कारण अजूनही स्पष्ट होऊ शकलेलं नाही. प्रश्न असा आहे की, खरोखरच ग्रामस्थांच्या टोमण्यांनी एका बापाला हे पाऊल उचलण्यास भाग पाडले की, यामागे आणखी काही कारण आहे.
इन्स्टाग्रामवर कोणतीही आक्षेपार्ह पोस्ट नाही
राधिकाचे इन्स्टाग्राम खाते प्रायव्हेट होते. तिचे फक्त 69 फॉलोअर्स होते आणि ती 67 लोकांना फॉलो करत होती. सर्व ओळखीचे, मित्र आणि प्रशिक्षक होते. तिने एकूण 6 पोस्ट टाकल्या होत्या. शेवटची पोस्ट एप्रिल 2025 मध्ये एका जाहिरातीच्या चित्रीकरणाची होती. तिच्या पोस्टमध्ये असे काहीही दिसत नाही, ज्यामुळे कोणत्याही पालकांना राग येईल. अशा स्थितीत, सोशल मीडियाला हत्येचे कारण मानणे चुकीचे ठरेल.
एफआयआरमध्ये टोमण्यांचा उल्लेख
एफआयआरमध्ये (FIR) नमूद आहे की, दीपक यादव ग्रामस्थांच्या टोमण्यांना कंटाळला होता. त्याच्यावर आरोप होता की तो मुलीच्या कमाईवर जगत आहे. पण वजीराबादमधील लोकांच्या म्हणण्यानुसार, दीपक आणि त्याचे कुटुंब खूप प्रभावशाली आहे. त्याचे महिन्याचे 20 ते 22 लाख रुपये भाड्याने येतात. अशा स्थितीत, त्याला मुलीच्या पैशाची गरज का भासेल? ग्रामस्थांचे असेही म्हणणे आहे की, दीपकला टोमणा देण्याची कोणाची हिंमत नाही.
राधिकाची कमाई आणि अकादमीवर संशय
सुरुवातीला असे म्हटले गेले की राधिकाने गुरुग्राममध्ये टेनिस अकादमी सुरू केली होती. पण खरं तर तिने कोणतीही कायमस्वरूपी अकादमी उघडली नव्हती. ती वेगवेगळ्या टेनिस अकादमी भाड्याने घेऊन मुलांना प्रशिक्षण देत होती. अशा स्थितीत, राधिकाची कमाई इतकी जास्त होती की तिचे वडील तिच्यावर अवलंबून होते, हा दावाही कमकुवत होतो.
ना प्रेमसंबंध, ना कौटुंबिक ताण
तपासात, राधिकाचे कोणाशीही प्रेमसंबंध (अफेअर) असल्याचं समोर आलेलं नाही. एका जुन्या म्युझिक व्हिडिओमुळे इनामुल नावाच्या मुलाचे नाव जोडले गेले, पण तो बराच काळ दुबईत आहे आणि दोघांचे नाते पूर्णपणे व्यावसायिक होते.
काही रिपोर्ट्समध्ये असे म्हटले आहे की, कुटुंबाने राधिकावर निर्बंध लादले होते. पण वस्तुस्थिती अशी आहे की, ती अनेकवेळा परदेशात टेनिस स्पर्धेत भाग घेण्यासाठी गेली होती. जर कुटुंब इतके कठोर असते, तर परदेश प्रवास कसा शक्य झाला असता?
हत्येचा कट? मित्राचा दावा
राधिकाची मैत्रीण हिमांशिकाने एका व्हिडिओमध्ये दावा केला आहे की, दीपक यादवने हत्येचा कट आधीच रचला होता. राधिकाच्या भावाला त्या दिवशी घराबाहेर पाठवण्यात आले आणि तिच्या पाळीव कुत्र्यालाही दूर ठेवले.
हत्येच्या दिवशी काय घडले
10 जुलै रोजी सकाळी 10:30 वाजता राधिकाचे काका कुलदीप यादव यांना गोळीचा आवाज आला. ते वर गेले, तेव्हा राधिका स्वयंपाकघरात रक्ताने माखलेली पडली होती. जवळच दीपक यादवच्या नावावर असलेली परवाना असलेली रिव्हॉल्वर सापडली. रिव्हॉल्वरमधून एकूण पाच गोळ्या झाडल्या होत्या.
घरात कोण-कोण होते
हत्येच्या वेळी घरात दीपक, त्याची पत्नी मंजू आणि राधिका हे तिघेच होते. मंजू दुसऱ्या खोलीत तापामुळे झोपली होती. मुलगा धीरज घरी नव्हता. सुरुवातीला दीपकने सांगितले की, तो मालमत्तेच्या कामासाठी बाहेर होता, पण सीसीटीव्ही फुटेजवरून स्पष्ट झाले की, तो दुध घेण्यासाठी गावात गेला होता.
