पूर्व रेल मन्त्री तथा टीएमसीका वरिष्ठ नेता मुकुल रॉयको कोलकातामा ७२ वर्षको उमेरमा निधन भएको छ। उनी पछिल्ला केही महिनादेखि गम्भीर रूपमा बिरामी रहेका थिए। स्रोतहरूका अनुसार उनको निधन राति करिब २:३५ बजे भएको हो। चिकित्सकहरूले उनको मृत्यु कार्डियाक अरेस्टका कारण भएको बताएका छन्।
लामो समयदेखि स्वास्थ्य समस्यासँग जुझिरहेका रॉयलाई कोलकातास्थित अपोलो अस्पतालमा भर्ना गरिएको थियो। चिकित्सकहरूले सन् २०२३ को सुरुवातमा उनलाई डिमेन्सिया र पार्किन्सन्स जस्ता रोग लागेको पुष्टि गरेका थिए। त्यसका कारण उनको स्मरणशक्ति कमजोर भएको थियो र शारीरिक गतिविधिमा उल्लेखनीय कमी आएको थियो। बिरामी अवस्थाका कारण उनी लामो समयदेखि अस्पतालमा थिए र केही महिनादेखि कोमामा रहेको जानकारी दिइएको छ।
रॉय केही वर्षदेखि सक्रिय राजनीतिबाट टाढा थिए। टीएमसीमा उनलाई ममता बनर्जीपछि पार्टीको प्रमुख नेताका रूपमा लिइन्थ्यो। उनलाई पार्टीको संकट व्यवस्थापक र रणनीतिकारका रूपमा चिनिन्थ्यो। चुनावी रणनीति निर्माण, सङ्कट समाधान तथा पार्टी सुदृढीकरणमा उनले महत्वपूर्ण भूमिका निर्वाह गरेका थिए।
सन् २०१० को दशकमा उनी र टीएमसीबीच सम्बन्धमा मतभेद देखिएको थियो। शारदा चिटफन्ड घोटाला लगायतका विवादपछि उनी पार्टीबाट टाढिएका थिए। फेब्रुअरी २०१५ मा उनलाई नेशनल जनरल सेक्रेटरी पदबाट हटाइएको थियो। त्यसपछि सेप्टेम्बर २०१७ मा उनले टीएमसीबाट राजीनामा दिए र नोभेम्बर २०१७ मा भारतीय जनता पार्टीमा प्रवेश गरे। जुन २०२१ मा उनले पुनः टीएमसीमा फर्किएका थिए।
पश्चिम बंगालको राजनीतिमा उनलाई ‘बंगालका चाणक्य’ भनेर सम्बोधन गरिन्थ्यो। उनको रणनीतिक समझ र राजनीतिक सूझबूझका कारण उनलाई राज्य राजनीतिमा महत्वपूर्ण व्यक्तित्वका रूपमा लिइन्थ्यो।
उनको निधनपछि पश्चिम बंगालको राजनीतिमा शोक व्यक्त गरिएको छ। टीएमसीका वरिष्ठ नेताहरू तथा अन्य राजनीतिक व्यक्तित्वहरूले शोक प्रकट गरेका छन्। मुख्यमन्त्री ममता बनर्जीले उनलाई पार्टीको बलियो स्तम्भ भन्दै उनका सेवाहरूको स्मरण गरेकी छन्। साथै केन्द्रीय नेताहरू तथा अन्य राज्यका वरिष्ठ नेताहरूले पनि सामाजिक सञ्जाल र सार्वजनिक मञ्चमार्फत श्रद्धाञ्जलि अर्पण गरेका छन्।
