भारतले अन्डर-१९ क्रिकेट विश्वकप २०२६ को फाइनलमा इंग्ल्यान्डलाई १०० रनले पराजित गर्दै छैटौँ उपाधि जितेको छ। फाइनल खेल जिम्बावेस्थित हरारे स्पोर्ट्स क्लब मैदानमा सम्पन्न भयो।
भारत र इंग्ल्यान्डबीचको अन्डर-१९ एकदिवसीय विश्वकपको उपाधि भिडन्तमा भारतले पहिले ब्याटिङ गर्दै ५० ओभरमा ९ विकेट गुमाएर ४११ रन बनायो। लक्ष्य पछ्याएको इंग्ल्यान्ड ४०.२ ओभरमा ३११ रनमै अलआउट भयो। यस जितसँगै भारतले अन्डर-१९ विश्वकपको छैटौँ उपाधि आफ्नो नाममा लेखायो।
भारतका लागि वैभव सूर्यवंशीले फाइनलमा ८० बलमा १७५ रन बनाए। उनको इनिङ्समा १५ चौका र १५ छक्का समावेश थिए। कप्तान आयुष म्हात्रेले ५३ रनको योगदान दिए। सूर्यवंशी र म्हात्रेले दोस्रो विकेटका लागि १४२ रनको साझेदारी गरे। सूर्यवंशीले तेस्रो विकेटका लागि वेदांत त्रिवेदीसँग ८९ रन जोडे। सूर्यवंशी आउट भएपछि भारतले थप १६० रन जोड्दै ४११ रनको स्कोर बनायो।
इंग्ल्यान्डतर्फबाट क्यालेब फाल्कनरले ६७ बलमा ११५ रनको शतक बनाए। तर उनको इनिङ्सले हार टार्न सकेन। इंग्ल्यान्ड ४०.२ ओभरमा ३११ रनमा समेटियो। इंग्ल्यान्डका लागि जेम्स मिन्टोले तीन विकेट लिए भने सेबास्टियन मोर्गन र एलेक्स ग्रिनले दुई–दुई विकेट लिए।
यो जितसँगै भारतले अन्डर-१९ विश्वकपमा आफ्नो छैटौँ उपाधि जितेको छ। यसअघि भारतले सन् २०००, २००८, २०१२, २०१८ र २०२२ मा अन्डर-१९ विश्वकप उपाधि जितेको थियो।
भारतले यस फाइनलमा अन्डर-१९ विश्वकप इतिहासकै सबैभन्दा ठूलो स्कोर बनायो। यसअघि इंग्ल्यान्डले यसै विश्वकपमा स्कटल्यान्डविरुद्ध ४०४ रन बनाएको थियो। फाइनलमा भारतको ४११ रनको स्कोर इंग्ल्यान्डका लागि कठिन लक्ष्य सावित भयो।
