ਕੁਰੂਕਸ਼ੇਤਰ ਦੇ ਕੇਸ਼ਵ ਪਾਰਕ ਵਿੱਚ 18 ਮਾਰਚ ਤੋਂ ਸ਼ੁਰੂ ਹੋਏ 102ਵੇਂ 1008 ਕੁੰਡੀਏ ਸ਼ਿਵ ਸ਼ਕਤੀ ਮਹਾਯਗ ਵਿੱਚ ਸ਼ਨਿਚਰਵਾਰ ਸਵੇਰੇ ਗੋਲੀ ਲੱਗਣ ਕਾਰਨ ਇੱਕ ਬ੍ਰਾਹਮਣ ਜ਼ਖ਼ਮੀ ਹੋ ਗਿਆ।
ਕੁਰੂਕਸ਼ੇਤਰ: ਹਰਿਆਣਾ ਦੇ ਕੇਸ਼ਵ ਪਾਰਕ ਵਿੱਚ ਆਯੋਜਿਤ 1008 ਕੁੰਡੀਏ ਸ਼ਿਵ ਸ਼ਕਤੀ ਮਹਾਯਗ ਦੌਰਾਨ ਸ਼ਨਿਚਰਵਾਰ ਨੂੰ ਮਾਹੌਲ ਅਚਾਨਕ ਹਿੰਸਕ ਹੋ ਗਿਆ। ਮਹਾਯਗ ਵਿੱਚ ਸ਼ਾਮਲ ਵੇਦ ਪਾਠੀਆਂ ਅਤੇ ਆਯੋਜਕਾਂ ਵਿਚਕਾਰ ਵਿਵਾਦ ਇੰਨਾ ਵੱਧ ਗਿਆ ਕਿ ਗੋਲੀਬਾਰੀ ਤੱਕ ਹੋ ਗਈ, ਜਿਸ ਵਿੱਚ ਇੱਕ ਬ੍ਰਾਹਮਣ ਜ਼ਖ਼ਮੀ ਹੋ ਗਿਆ। ਜ਼ਖ਼ਮੀ ਨੂੰ ਤੁਰੰਤ ਲੋਕ ਨਾਇਕ ਜੈਪ੍ਰਕਾਸ਼ ਹਸਪਤਾਲ ਵਿੱਚ ਦਾਖਲ ਕਰਵਾਇਆ ਗਿਆ ਹੈ।
ਵਿਵਾਦ ਕਿਵੇਂ ਭੜਕਿਆ?
ਸੂਤਰਾਂ ਮੁਤਾਬਕ, ਵਿਵਾਦ ਦੀ ਸ਼ੁਰੂਆਤ ਭੋਜਨ ਦੀ ਗੁਣਵੱਤਾ ਨੂੰ ਲੈ ਕੇ ਹੋਈ। ਵੇਦ ਪਾਠੀਆਂ ਨੇ ਆਯੋਜਕ ਬਾਬਾ ਹਰਿਓਮ ਉੱਤੇ ਖਰਾਬ ਭੋਜਨ ਪਰੋਸਣ ਦਾ ਦੋਸ਼ ਲਗਾਇਆ, ਜਿਸ ਕਾਰਨ ਮਹਾਯਗ ਵਿੱਚ ਅਸ਼ਾਂਤੀ ਫੈਲ ਗਈ। ਜਦੋਂ ਮਾਮਲਾ ਵੱਧ ਗਿਆ ਤਾਂ ਬਾਬਾ ਦੇ ਬਾਊਂਸਰਾਂ ਨੇ ਪਹਿਲਾਂ ਲਾਠੀਆਂ ਚਲਾਈਆਂ, ਫਿਰ ਗੋਲੀ ਚਲਾਈ, ਜਿਸ ਨਾਲ ਇੱਕ ਬ੍ਰਾਹਮਣ ਨੂੰ ਗੋਲੀ ਲੱਗ ਗਈ। ਗੋਲੀਬਾਰੀ ਤੋਂ ਬਾਅਦ ਮਹਾਯਗ ਵਿੱਚ ਮੌਜੂਦ ਵੇਦ ਪਾਠਕ ਭੜਕ ਗਏ ਅਤੇ ਪੰਡਾਲ ਵਿੱਚ ਤੋੜਫੋੜ ਸ਼ੁਰੂ ਕਰ ਦਿੱਤੀ।
ਉਨ੍ਹਾਂ ਨੇ ਹੋਰਡਿੰਗਜ਼ ਅਤੇ ਬੈਨਰ ਪਾੜ ਦਿੱਤੇ, ਲੱਕੜ ਦੇ ਡੰਡੇ ਕੱਢ ਕੇ ਹਵਾ ਵਿੱਚ ਲਹਿਰਾਉਣ ਲੱਗੇ ਅਤੇ ਬਾਬਾ ਦੇ ਖਿਲਾਫ ਨਾਅਰੇਬਾਜ਼ੀ ਕਰਦੇ ਹੋਏ ਮੁੱਖ ਸੜਕ ਉੱਤੇ ਆ ਗਏ। ਗੁੱਸੇ ਵਿੱਚ ਆਏ ਬ੍ਰਾਹਮਣਾਂ ਨੇ ਸੜਕ ਜਾਮ ਕਰ ਦਿੱਤੀ, ਜਿਸ ਕਾਰਨ ਟ੍ਰੈਫਿਕ ਪ੍ਰਭਾਵਿਤ ਹੋ ਗਿਆ।
ਤਣਾਅ ਦੇ ਚੱਲਦਿਆਂ ਪੁਲਿਸ ਬਲ ਤਾਇਨਾਤ
ਸਥਿਤੀ ਨੂੰ ਵਿਗੜਦੇ ਦੇਖ ਕੇ ਸਥਾਨਕ ਪ੍ਰਸ਼ਾਸਨ ਅਤੇ ਪੁਲਿਸ ਬਲ ਮੌਕੇ ਉੱਤੇ ਪਹੁੰਚ ਗਿਆ। ਪੁਲਿਸ ਦੀ ਵਜ਼ਰ ਗੱਡੀ ਅਤੇ ਫਾਇਰ ਬ੍ਰਿਗੇਡ ਦੀਆਂ ਟੀਮਾਂ ਵੀ ਤਾਇਨਾਤ ਕੀਤੀਆਂ ਗਈਆਂ ਹਨ। ਫਿਲਹਾਲ ਇਲਾਕੇ ਵਿੱਚ ਤਣਾਅਪੂਰਨ ਮਾਹੌਲ ਬਣਿਆ ਹੋਇਆ ਹੈ, ਪਰ ਪੁਲਿਸ ਸਥਿਤੀ ਨੂੰ ਕਾਬੂ ਕਰਨ ਦੀ ਕੋਸ਼ਿਸ਼ ਕਰ ਰਹੀ ਹੈ। ਪੁਲਿਸ ਅਧਿਕਾਰੀਆਂ ਨੇ ਦੋਨੋਂ ਧਿਰਾਂ ਤੋਂ ਸ਼ਾਂਤੀ ਬਣਾਈ ਰੱਖਣ ਦੀ ਅਪੀਲ ਕੀਤੀ ਹੈ। ਘਟਨਾ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਗਈ ਹੈ, ਅਤੇ ਦੋਸ਼ੀਆਂ ਉੱਤੇ ਸਖ਼ਤ ਕਾਰਵਾਈ ਦਾ ਭਰੋਸਾ ਦਿੱਤਾ ਗਿਆ ਹੈ।
