બજેટ 2026-27 રજૂ કરતાં નાણામંત્રી નિર્મલા સીતારમણે માઇક્રો, સ્મોલ એન્ડ મિડિયમ એન્ટરપ્રાઇઝિસ (MSME) ક્ષેત્ર માટે 10,000 કરોડ રૂપિયાના MSME ગ્રોથ ફંડની જાહેરાત કરી છે. આ ફંડનો ઉદ્દેશ નાના અને મધ્યમ ઉદ્યોગોને ઇક્વિટી સપોર્ટ પૂરો પાડવાનો છે.
નાણામંત્રીએ જણાવ્યું કે MSME ક્ષેત્રને દેશની આર્થિક રીઢ તરીકે જોવામાં આવે છે અને તેને ભવિષ્યના ચેમ્પિયન તરીકે વિકસાવવાનો સ્પષ્ટ રોડમેપ બજેટમાં રજૂ કરવામાં આવ્યો છે. વિકસિત ભારતના લક્ષ્ય સુધી પહોંચવા માટે MSME ક્ષેત્રને મજબૂત બનાવવું આવશ્યક હોવાનું તેમણે જણાવ્યું.
MSME ગ્રોથ ફંડ ખાસ કરીને નાના અને મધ્યમ ઉદ્યોગોને ઇક્વિટી આધારિત મૂડી ઉપલબ્ધ કરાવશે, જેથી તેઓ માત્ર ઋણ પર નિર્ભર ન રહે. સરકારના જણાવ્યા મુજબ, આ વ્યવસ્થા ઉદ્યોગોની નાણાકીય સ્થિતિ મજબૂત કરશે અને લાંબા ગાળાની વૃદ્ધિમાં સહાયરૂપ થશે.
બજેટ 2026માં MSME ક્ષેત્રને વૈશ્વિક સ્તરે સ્પર્ધાત્મક બનાવવા માટે ટેકનોલોજી, ફાઇનાન્સ અને માર્કેટ એક્સેસ પર ધ્યાન કેન્દ્રિત કરવાની રણનીતિ રજૂ કરવામાં આવી છે.
લિક્વિડિટી સપોર્ટ માટે Trade Receivables Discounting System (TReDS)ને વધુ મજબૂત બનાવવાની જાહેરાત કરવામાં આવી છે. નાણામંત્રીએ જણાવ્યું કે સમયસર ચુકવણી સુનિશ્ચિત કરવા અને રોકડ પ્રવાહની સમસ્યા ઘટાડવા માટે TReDS મારફતે MSMEને 7 લાખ કરોડ રૂપિયાથી વધુની નાણાકીય સુવિધા ઉપલબ્ધ કરાવવામાં આવશે.
સરકારે નાના ઉદ્યોગોથી સીધી ખરીદી માટે નવી વ્યવસ્થા વિકસાવવાની પણ જાહેરાત કરી છે. આ પગલાંથી MSMEને સ્થિર બજાર મળશે અને સરકારી ખરીદીમાં તેમની ભાગીદારી વધશે.
બજેટ 2026માં 10,000 કરોડ રૂપિયાનો Dedicated SME Development Fund શરૂ કરવાની જાહેરાત કરવામાં આવી છે. આ ફંડ MSMEને ઇક્વિટી સહાય તરીકે ઉપલબ્ધ કરાવવામાં આવશે જેથી નવી ટેકનોલોજી અપનાવવી, ઉત્પાદન ક્ષમતા વધારવી અને નવા બજારોમાં પ્રવેશ કરવો સરળ બનશે.
આ ઉપરાંત આત્મનિર્ભર ભારત કોષમાં વધારાના 2,000 કરોડ રૂપિયા ફાળવવાની જાહેરાત કરવામાં આવી છે, જેનો હેતુ MSME અને સ્ટાર્ટઅપ્સને ઇક્વિટી સપોર્ટ પૂરો પાડવાનો છે.
ટિયર-2 અને ટિયર-3 શહેરોમાં ‘કોર્પોરેટ મિત્ર’ કેડર તૈયાર કરવાની નવી પહેલ પણ બજેટમાં રજૂ કરવામાં આવી છે. આ વ્યવસ્થા હેઠળ MSMEને ટેક્સ, અનુપાલન, એકાઉન્ટિંગ અને કાનૂની પ્રક્રિયાઓ માટે ઓછી કિંમતમાં વ્યાવસાયિક સહાય મળશે.
સરકારે MSME માટે નિયમનકારી અનુપાલન સરળ બનાવવાનો વિશ્વાસ પણ વ્યક્ત કર્યો છે જેથી દંડ અને કાનૂની મુશ્કેલીઓમાં ઘટાડો થાય.
નાણામંત્રીએ વિકસિત ભારત લક્ષ્ય માટે ત્રણ મુખ્ય કર્તવ્યો રજૂ કર્યા જેમાં ઉત્પાદકતા વધારવી, રોજગાર અને આવકના અવસર વિસ્તૃત કરવો અને સર્વસમાવેશક વિકાસનો સમાવેશ થાય છે. MSME ક્ષેત્ર આ લક્ષ્યો હાંસલ કરવામાં મહત્વપૂર્ણ ભૂમિકા ભજવશે તેમ તેમણે જણાવ્યું.
બજેટ 2026માં Semiconductor Mission 2.0ની પણ જાહેરાત કરવામાં આવી છે, જેના હેઠળ નવા સેમિકન્ડક્ટર મેન્યુફેક્ચરિંગ યુનિટ્સને પ્રોત્સાહન આપવામાં આવશે, જેનાથી સપ્લાય ચેન મજબૂત થશે.
એક્સપર્ટ્સના જણાવ્યા મુજબ MSME ગ્રોથ ફંડ અને લિક્વિડિટી સપોર્ટ દ્વારા લાખો નવા રોજગાર સર્જાવાની સંભાવના છે, જે સ્થાનિક અર્થવ્યવસ્થાને મજબૂતી આપશે.
