વિમેન્સ પ્રીમિયર લીગ (WPL) 2026ના 13મા મુકાબલામાં મંગળવારે બીસીએ સ્ટેડિયમ ખાતે દિલ્હી કેપિટલ્સે મુંબઈ ઇન્ડિયન્સને 7 વિકેટે પરાજય આપીને સીઝનની બીજી જીત નોંધાવી.
ટોસ હારીને પહેલા બેટિંગ કરવા ઉતરેલી મુંબઈ ઇન્ડિયન્સની શરૂઆત નબળી રહી હતી અને ટીમે 21 રનમાં બંને ઓપનિંગ વિકેટ ગુમાવી હતી. સજીવન સજ્જનાએ 9 રન બનાવ્યા હતા જ્યારે હેલી મેથ્યૂઝ 12 રન કરીને આઉટ થઈ હતી. ત્યારબાદ નેટ સાયવર-બ્રન્ટ અને કપ્તાન હરમનપ્રીત કૌરે ત્રીજી વિકેટ માટે 58 બોલમાં 78 રનની ભાગીદારી કરી. હરમનપ્રીત કૌરે 33 બોલમાં 7 ચોગ્ગાની મદદથી 41 રન બનાવ્યા.
કપ્તાનના આઉટ થયા બાદ સાયવર-બ્રન્ટે નિકોલા કેરી સાથે ઇનિંગ્સ આગળ વધારી. કેરીએ 12 રનનું યોગદાન આપ્યું. અંતે સાયવર-બ્રન્ટે 45 બોલમાં અણનમ 65 રન બનાવ્યા જેમાં 6 ચોગ્ગા અને 2 છક્કાનો સમાવેશ હતો. મુંબઈ ઇન્ડિયન્સે નિર્ધારિત 20 ઓવરમાં 5 વિકેટના નુકસાને 154 રન બનાવ્યા. દિલ્હી તરફથી શ્રી ચરણીએ 3 વિકેટ લીધી જ્યારે મારિજાન કપ્પ અને નંદિની શર્માને એક-એક વિકેટ મળી.
155 રનના લક્ષ્યનો પીછો કરતી દિલ્હી કેપિટલ્સને શેફાલી વર્મા અને લિઝેલ લી એ મજબૂત શરૂઆત અપાવી. બંનેએ પ્રથમ વિકેટ માટે 7.3 ઓવરમાં 63 રનની ભાગીદારી કરી. શેફાલી વર્માએ 24 બોલમાં 6 ચોગ્ગાની મદદથી 29 રન બનાવ્યા. ત્યારબાદ લિઝેલ લીએ લૌરા વોલવાર્ડ સાથે ઇનિંગ્સ આગળ વધારી. લીએ 46 રન બનાવ્યા જેમાં 7 ચોગ્ગા અને 1 છક્કો સામેલ હતો.
મધ્યક્રમમાં થોડો દબાણ સર્જાયા બાદ કપ્તાન જેમિમા રોડ્રિગ્ઝે જવાબદારી સંભાળી. તેમણે લૌરા વોલવાર્ડ અને પછી મારિજાન કપ્પ સાથે ઉપયોગી ભાગીદારીઓ કરી. જેમિમાએ 37 બોલમાં અણનમ 51 રન બનાવ્યા જેમાં 5 ચોગ્ગા અને 1 છક્કો હતો. અંતે મારિજાન કપ્પે 6 બોલમાં અણનમ 10 રન બનાવી જીત નિશ્ચિત કરી. દિલ્હીએ 19 ઓવરમાં લક્ષ્ય હાંસલ કર્યું.
આ મુકાબલા બાદ મુંબઈ ઇન્ડિયન્સે 6માંથી 4 મેચ હારવા છતાં અંક કોષ્ટકમાં બીજા સ્થાને સ્થાન જાળવી રાખ્યું છે. દિલ્હી કેપિટલ્સે 5માંથી 2 મેચ જીતીને ચોથું સ્થાન મેળવ્યું છે. રોયલ ચેલેન્જર્સ બેંગલુરુ પહેલેથી જ આગામી રાઉન્ડ માટે ક્વોલિફાય કરી ચૂકી છે, જ્યારે બાકીની ચાર ટીમો પ્લેઓફની દોડમાં યથાવત છે.
