પ્રધાનમંત્રી નરેન્દ્ર મોદી અને યુરોપિયન કમિશનના અધ્યક્ષા ઉર્સુલા વોન ડેર લેયન વચ્ચે શુક્રવારે એક મહત્વપૂર્ણ બેઠક યોજાઈ હતી, જેમાં ભારત અને યુરોપિયન યુનિયન (EU) વચ્ચેના વ્યૂહાત્મક સહયોગને નવી ગતિ આપવા પર ભાર મુકવામાં આવ્યો હતો.
નવી દિલ્હી: ભારતના પ્રધાનમંત્રી નરેન્દ્ર મોદી અને યુરોપિયન કમિશનના અધ્યક્ષા ઉર્સુલા વોન ડેર લેયન વચ્ચે શુક્રવારે મહત્વપૂર્ણ વાતચીત થઈ. બંને નેતાઓએ ભારત અને યુરોપિયન યુનિયન વચ્ચેની વ્યૂહાત્મક ભાગીદારીને નવી ગતિ આપવા પર ધ્યાન કેન્દ્રિત કર્યું. ઉલ્લેખનીય છે કે ઉર્સુલા વોન ડેર લેયન ‘EU કોલેજ ઓફ કમિશનર્સ’ એટલે કે 27 સભ્ય દેશોના વરિષ્ઠ રાજકીય નેતાઓ સાથે ભારતની મુલાકાતે આવ્યા છે. આ મુલાકાતમાં સંરક્ષણ, સુરક્ષા અને મહત્વપૂર્ણ ટેકનોલોજી જેવા મુખ્ય ક્ષેત્રોમાં સહયોગને મજબૂત કરવાની દિશામાં ચર્ચા કરવામાં આવી.
ભારત સાથે જાપાન અને દક્ષિણ કોરિયા જેવી સુરક્ષા ભાગીદારી ઈચ્છે EU
યુરોપિયન યુનિયને ભારત સાથે જાપાન અને દક્ષિણ કોરિયાની જેમ સુરક્ષા ભાગીદારી વિકસાવવાની ઇચ્છા વ્યક્ત કરી છે. વોન ડેર લેયનએ એક મુખ્ય થિંક ટેન્કને સંબોધતા કહ્યું કે વૈશ્વિક શક્તિ સંતુલનમાં સતત ફેરફાર થઈ રહ્યા છે, જેનાથી ભારત અને યુરોપ માટે નવા દ્રષ્ટિકોણથી પોતાની વ્યૂહાત્મક ભાગીદારીને ફરીથી વ્યાખ્યાયિત કરવાની તક મળી છે.
તેમણે કહ્યું, "ભારત પોતાના સંરક્ષણ ક્ષેત્રને મજબૂત કરવા અને લશ્કરી સપ્લાય ચેઈનમાં વૈવિધ્ય લાવવા પર કાર્ય કરી રહ્યું છે. યુરોપિયન યુનિયન આ પ્રક્રિયામાં એક વિશ્વસનીય સહયોગી બની શકે છે."
વર્ષના અંત સુધીમાં મુક્ત વેપાર કરાર (FTA) પર સંમતિ
બેઠકમાં બંને પક્ષોએ આ વર્ષના અંત સુધીમાં ભારત-EU મુક્ત વેપાર કરાર (FTA)ને અંતિમ સ્વરૂપ આપવા પર પણ સંમતિ વ્યક્ત કરી. આ કરાર વેપાર અને રોકાણને પ્રોત્સાહન આપવાની સાથે બંને અર્થતંત્રો વચ્ચેના આર્થિક સહયોગને મજબૂત કરશે. પ્રધાનમંત્રી મોદીએ ભારત અને EUના સંબંધોને સ્વાભાવિક ભાગીદારી ગણાવતા કહ્યું કે આ સહયોગ બંને પક્ષોના લાંબા ગાળાના વિકાસ અને સ્થિરતા માટે જરૂરી છે.
IMEECને આગળ વધારવા પર સંમતિ
બેઠકમાં ભારત-મધ્ય પૂર્વ-યુરોપ ઇકોનોમિક કોરિડોર (IMEEC)ને લઈને પણ મજબૂત પગલાં ભરવા પર સંમતિ બની. પ્રધાનમંત્રી મોદીએ આ યોજનાને વૈશ્વિક વેપાર અને સતત વિકાસ માટે એક મહત્વપૂર્ણ એન્જિન ગણાવી. તેમણે કહ્યું, "IMEEC માત્ર ભારત અને યુરોપ જ નહીં પરંતુ સમગ્ર વિશ્વ માટે વ્યાપારિક સંભાવનાઓ વધારવાનું એક મહત્વપૂર્ણ માધ્યમ બનશે."
યુરોપિયન યુનિયન અને ભારત હિંદ-પ્રશાંત પ્રદેશમાં શાંતિ, સુરક્ષા અને સ્થિરતાને લઈને પણ સંમત દેખાયા. વોન ડેર લેયને કહ્યું કે આ પ્રદેશ વૈશ્વિક શક્તિ સંતુલનના કેન્દ્રમાં છે અને ભારત અને યુરોપે મળીને તેની સુરક્ષા સુનિશ્ચિત કરવી પડશે. ભારત અને EU વચ્ચે વધતા સહયોગને જોતા આ બેઠક બંને પક્ષો માટે એક મહત્વપૂર્ણ પડાવ સાબિત થઈ.
