રાષ્ટ્રપતિ દ્રૌપદી મુર્મુ આજે પંજાબના પ્રવાસે અમૃતસર પહોંચ્યા, જ્યાં તેઓ ગુરુ નાનક દેવ યુનિવર્સિટી (જીએનડીઉ)માં આયોજિત 50મી ગોલ્ડન જુબિલી કન્વોકેશનમાં હાજરી આપશે. આ પ્રસંગે રાષ્ટ્રપતિ વિદ્યાર્થીઓને ડિગ્રી અને મેડલ અર્પણ કરશે, જેમાં કુલ 463 વિદ્યાર્થીઓનો સમાવેશ થાય છે.
રાષ્ટ્રપતિના આગમનને ધ્યાનમાં રાખીને અમૃતસર ખાતે પોલીસ અને વહીવટીતંત્ર દ્વારા કડક સુરક્ષા વ્યવસ્થા કરવામાં આવી છે. ગુરુ નાનક દેવ યુનિવર્સિટી મેનેજમેન્ટ, જિલ્લા વહીવટીતંત્ર અને રાજ્ય પોલીસ દ્વારા સંયુક્ત રીતે સુરક્ષા રિહર્સલ પૂર્ણ કરી કાર્યક્રમ માટેની તૈયારીઓ પૂર્ણ કરવામાં આવી છે.
કન્વેન્શન હોલ અને યુનિવર્સિટી પરિસરમાં પ્રવેશ પહેલાં તમામ વ્યક્તિઓની તલાશી અને ઓળખ તપાસ કરવામાં આવી રહી છે. એસ.એસ. પરમારની અધ્યક્ષતામાં એડિજિપી સ્તરની ટીમે કન્વેન્શન સ્થળે સુરક્ષા ધોરણો, રૂટ પ્લાન અને રિહર્સલની વિગતવાર સમીક્ષા કરી છે.
યુનિવર્સિટીના વાઇસ ચાન્સેલર પ્રોફેસર ડૉ. કરમજીત સિંહ, ડેપ્યુટી કમિશનર દલવિંદરજીત સિંહ, પોલીસ કમિશનર ગુરપ્રીત સિંહ ભુલ્લર અને એઆઇજી પરમિંદર સિંહ ભંડાલ સહિતના વરિષ્ઠ અધિકારીઓ સુરક્ષા વ્યવસ્થાની દેખરેખ રાખી રહ્યા છે. વિદ્યાર્થીઓ અને સામાન્ય નાગરિકો માટે પાસ અને ઓળખ દસ્તાવેજો જારી કરવામાં આવ્યા છે. ડિગ્રી અને મેડલ પ્રાપ્ત કરનારા વિદ્યાર્થીઓ માટે પ્રવેશ દસ્તાવેજો અને ટેગ નંબર નક્કી કરવામાં આવ્યા છે. સમગ્ર પરિસર અને આસપાસના વિસ્તારોમાં બેરિકેડિંગ કરીને સુરક્ષા સુનિશ્ચિત કરવામાં આવી છે.
આ કન્વોકેશનમાં કુલ 463 વિદ્યાર્થીઓને ડિગ્રી અને મેડલ આપવામાં આવશે. તેમાં 74 અન્ડરગ્રેજ્યુએટ વિદ્યાર્થીઓ, 102 પોસ્ટગ્રેજ્યુએટ વિદ્યાર્થીઓ, 270 પીએચડી ડિગ્રી પ્રાપ્ત કરનારા વિદ્યાર્થીઓ અને 7 મેમોરિયલ મેડલનો સમાવેશ થાય છે. ઉપરાંત, યુનિવર્સિટી બે પ્રખ્યાત હસ્તીઓને ઓનરરી ડોક્ટરેટ પણ પ્રદાન કરશે.
કાર્યક્રમમાં મુખ્યમંત્રી ભગવંત સિંહ માન અને રાજ્યપાલ ગુલાબચંદ કટારિયા પણ મુખ્ય અતિથિ તરીકે હાજર રહેશે. મુખ્યમંત્રી ભગવંત સિંહ માન ગુરુવારે હરમંદિર સાહિબ અને અકાલ તખ્તમાં વિશેષ સ્પષ્ટીકરણ આપવાના છે, જેના કારણે ત્યાં પણ કડક સુરક્ષા વ્યવસ્થા અમલમાં મુકવામાં આવી છે.
