ઉત્તર પ્રદેશ વિધાનસભામાં શુક્રવાર, 13 ફેબ્રુઆરીના રોજ રાજ્યપાલના અભિભાષણ પર પ્રતિભાવ આપતાં મુખ્યમંત્રી યોગી આદિત્યનાથે સમાજવાદી પાર્ટી પર નિશાન સાધ્યું. તેમણે પોતાના શાયરાના અંદાજમાં વિરોધ પક્ષના વર્તન અંગે ટિપ્પણી કરતાં કહ્યું, ‘ધૂલ ચહેરે પર હતી, આઈનો સાફ કરતા રહ્યા.’
મુખ્યમંત્રીએ જણાવ્યું કે આજે ભારત વિશ્વને દિશા બતાવી રહ્યું છે. તેમણે અભિભાષણ દરમિયાન વિરોધ પક્ષના વર્તનને અયોગ્ય ગણાવ્યું અને કહ્યું કે સમાજવાદી પાર્ટીના આચરણને કારણે સમગ્ર સભા આહત અનુભવી રહી હતી. તેમણે જણાવ્યું કે વિરોધ પક્ષના વર્તનને કારણે અગાઉ ઉત્તર પ્રદેશને શંકાની નજરે જોવામાં આવતો હતો, પરંતુ હવે ઉત્તર પ્રદેશ ભારતના વિકાસનો અગ્રણિ એન્જિન બની ચૂક્યો છે.
યોગી આદિત્યનાથે જણાવ્યું કે 2017 પહેલા ઉત્તર પ્રદેશમાં નીતિગત ઉદાસીનતા અને વિકાસ વિરોધી વિચારસરણી હાવી હતી. તેમણે કહ્યું કે સમાજવાદી પાર્ટીના અગાઉના આચરણને કારણે રાજ્યની સામાજિક અને વહીવટી છબી પર અસર પડી હતી.
મુખ્યમંત્રીએ જણાવ્યું કે અગાઉ રાજ્યમાં અપરાધીઓ અને ગુન્ડાઓની સમાંતર સરકાર ચાલતી હતી અને કર્ફ્યૂ તથા દંગા સામાન્ય બાબત હતી. તેમણે કહ્યું કે તે સમયગાળા દરમિયાન યુવાઓ ઓળખ સંકટનો સામનો કરી રહ્યા હતા અને સત્તાના સંરક્ષણમાં ગુન્ડા અને માફિયા તત્વો ફાલતા-ફૂલતા હતા. હાલ અપરાધીઓ પ્રત્યે રાજ્યની નીતિ શૂન્ય સહનશીલતા (જીરો ટોલરન્સ)ની હોવાનું તેમણે જણાવ્યું.
યોગી આદિત્યનાથે કહ્યું કે હાલમાં ઉત્તર પ્રદેશમાં ભય નહીં પરંતુ આસ્થા અને સુરક્ષાનું વાતાવરણ છે. તેમણે કુંભ અને માઘ મેળામાં કરોડો શ્રદ્ધાળુઓની હાજરીને આ દાવાનું પ્રમાણ ગણાવ્યું. પ્રયાગરાજ માઘ મેળામાં 21 કરોડ લોકો શ્રદ્ધા અને ઉત્સાહ સાથે પહોંચ્યા હોવાનું તેમણે જણાવ્યું.
મુખ્યમંત્રીએ જણાવ્યું કે અગાઉ રાજ્યમાં દીકરીઓ અને વેપારીઓ સુરક્ષિત નહોતા, પરંતુ હવે તેમના માટે સુરક્ષા અને સુવિધાઓનું વ્યાપક આયોજન કરવામાં આવ્યું છે. ‘વન ડિસ્ટ્રિક્ટ–વન માફિયા’ જેવી પહેલ દ્વારા અપરાધ અને માફિયા નેટવર્ક પર નિયંત્રણ મેળવવામાં આવ્યું હોવાનું તેમણે કહ્યું. તેમણે જણાવ્યું કે ઉત્તર પ્રદેશ હવે ઉપદ્રવ પ્રદેશ નહીં પરંતુ ઉત્સવ પ્રદેશ તરીકે ઓળખાઈ રહ્યો છે.
યોગી આદિત્યનાથે છેલ્લા નવ વર્ષ દરમિયાન કરાયેલા વિકાસકાર્યો અને વહીવટી સુધારાઓનો પણ ઉલ્લેખ કર્યો. તેમણે જણાવ્યું કે અનુશાસન અને નીતિ-નિયમન સાથે ઉત્તર પ્રદેશે પોતાની નવી ઓળખ સ્થાપિત કરી છે.
