કાયદા અને મેનેજમેન્ટ કોર્સમાં પ્રવેશની તૈયારી કરી રહેલા ઉમેદવારો માટે CLAT 2027 અને XAT 2027ની પરીક્ષા તારીખો તેમજ અરજી કાર્યક્રમ જાહેર કરવામાં આવ્યો છે. બંને પ્રવેશ પરીક્ષાઓના સિલેબસ અને પરીક્ષા પેટર્નમાં કોઈ ફેરફાર કરવામાં આવ્યો નથી.
કન્સોર્ટિયમ ઑફ નેશનલ લો યુનિવર્સિટીઝ (Consortium of NLUs)એ CLAT 2027ની પરીક્ષાનું સમયપત્રક જાહેર કર્યું છે. પરીક્ષા 6 ડિસેમ્બર 2026ના રોજ બપોરે 2 વાગ્યાથી સાંજે 4 વાગ્યા સુધી યોજાશે. રસ ધરાવતા ઉમેદવારો 3 ઑગસ્ટથી ઑનલાઇન અરજી કરી શકશે, જ્યારે અરજી કરવાની છેલ્લી તારીખ 31 ઑક્ટોબર 2026 નક્કી કરવામાં આવી છે.
આ વર્ષે પણ પરીક્ષાનો પેટર્ન અને સિલેબસ અગાઉની જેમ જ રહેશે. ઉમેદવારોને કુલ 120 બહુવિકલ્પીય પ્રશ્નો (MCQs) પૂછવામાં આવશે અને પરીક્ષાનો સમયગાળો 2 કલાકનો રહેશે. પ્રશ્નપત્રમાં English Language, Current Affairs and General Knowledge, Legal Reasoning, Logical Reasoning અને Quantitative Techniques વિષયોના પ્રશ્નો સામેલ રહેશે. CLAT સ્કોરના આધારે દેશની 24 National Law Universities (NLUs) સહિત અનેક મુખ્ય કાયદા સંસ્થાઓમાં પ્રવેશ મળશે.
XLRI જામશેદપુરે Xavier Aptitude Test (XAT) 2027ની પરીક્ષા તારીખ પણ જાહેર કરી છે. આ પરીક્ષા 4 જાન્યુઆરી 2027ના રોજ કમ્પ્યુટર આધારિત (CBT) મોડમાં યોજાશે. તેના માટે અરજી પ્રક્રિયા શરૂ થઈ ચૂકી છે અને ઉમેદવારો 5 ડિસેમ્બર 2026 સુધી ઑનલાઇન consortiumofnlus.ac.in પર અરજી કરી શકે છે. અરજી ફી ₹2,300 નક્કી કરવામાં આવી છે.
આ પરીક્ષા માટે કોઈપણ માન્યતા પ્રાપ્ત યુનિવર્સિટીમાંથી સ્નાતક થયેલા અથવા અંતિમ વર્ષમાં અભ્યાસ કરતા વિદ્યાર્થીઓ અરજી કરવા પાત્ર છે. પ્રશ્નપત્રમાં Verbal and Logical Ability, Decision Making, Quantitative Ability and Data Interpretation તથા General Knowledge જેવા મુખ્ય વિભાગો સામેલ રહેશે. તેમાં Decision Making વિભાગને XATની વિશિષ્ટ ઓળખ માનવામાં આવે છે.
XAT 2027ના સ્કોરના આધારે XLRI જામશેદપુર ઉપરાંત XIM University, IMT ગાઝિયાબાદ, TAPMI મણિપાલ, GIM ગોવા, Great Lakes, FORE School of Management અને LIBA સહિત 250થી વધુ પ્રતિષ્ઠિત બિઝનેસ સ્કૂલોમાં MBA અને PGDM કાર્યક્રમોમાં પ્રવેશ મળશે.
શિક્ષણ નિષ્ણાતોનું કહેવું છે કે બંને પરીક્ષાઓના સિલેબસ અને પેટર્નમાં કોઈ ફેરફાર ન હોવાથી ઉમેદવારો પોતાની વર્તમાન તૈયારીની રણનીતિ સાથે અભ્યાસ ચાલુ રાખી શકે છે. તેમણે અંતિમ તારીખની રાહ જોવાને બદલે સમયસર અરજી પૂર્ણ કરવાની પણ સલાહ આપી છે જેથી તકનીકી સમસ્યાઓથી બચી શકાય અને પરીક્ષાની તૈયારી પર સંપૂર્ણ ધ્યાન કેન્દ્રિત કરી શકાય.
