भारत 26 जानेवारी रोजी 77वा प्रजासत्ताक दिन साजरा करत आहे. या निमित्ताने नवी दिल्लीतील कर्तव्य पथावर होणाऱ्या परेडसाठी सरकारने विविध क्षेत्रांतील सुमारे 10,000 विशेष पाहुण्यांना आमंत्रित केले आहे.
सरकारने प्रजासत्ताक दिन 2026 साठी विशेष पाहुण्यांची निवड करताना समाजातील विविध घटक आणि व्यावसायिक क्षेत्रांचा समावेश केला आहे. या पाहुण्यांमध्ये सामाजिक कार्यकर्ते, शिक्षक, शास्त्रज्ञ, कलाकार, क्रीडा क्षेत्रातील खेळाडू, युवा उद्योजक तसेच नवोन्मेष क्षेत्रात योगदान देणारे नागरिक आहेत.
कर्तव्य पथावर आयोजित परेडमध्ये विशेष पाहुण्यांची उपस्थिती राहणार असून या परेडद्वारे देशाची लष्करी क्षमता, सांस्कृतिक विविधता, विज्ञान व तंत्रज्ञानातील उपलब्धी आणि क्रीडा क्षेत्रातील यशाचे प्रदर्शन केले जाईल.
प्रजासत्ताक दिन दरवर्षी 26 जानेवारी रोजी साजरा केला जातो. 26 जानेवारी 1950 रोजी भारताचे संविधान अंमलात आले आणि भारत एक संप्रभु, समाजवादी, धर्मनिरपेक्ष, लोकशाही प्रजासत्ताक म्हणून अस्तित्वात आला.
77व्या प्रजासत्ताक दिनानिमित्त आयोजित परेडमध्ये 10,000 विशेष पाहुणे सहभागी होणार आहेत. इतक्या मोठ्या संख्येने विविध क्षेत्रांतील नागरिकांना प्रजासत्ताक दिनाच्या कार्यक्रमासाठी आमंत्रित करण्याची ही पहिलीच वेळ असल्याचे सरकारकडून सांगण्यात आले आहे.
परेडदरम्यान सशस्त्र दलांचे तुकडी, पॅराट्रूपर्स तसेच विविध लष्करी आणि नागरी पथके सहभागी होणार आहेत. याशिवाय राज्यनिहाय सांस्कृतिक चित्ररथ, आधुनिक तंत्रज्ञान आणि विज्ञानविषयक प्रदर्शने कर्तव्य पथावर सादर केली जाणार आहेत. विशेष पाहुण्यांसाठी बैठक व्यवस्था आणि सुरक्षेचे व्यापक नियोजन करण्यात आले आहे.
