بھارت میں لوک سبھا اور اسمبلی انتخابات ایک ساتھ کرانے کے امکانات پر بحث کافی عرصے سے جاری ہے۔ اسی سلسلے میں الیکشن کمیشن کی ایک رپورٹ سامنے آئی ہے جس میں بتایا گیا ہے کہ اگر ملک میں 2029ء میں لوک سبھا اور اسمبلی انتخابات ایک ساتھ کرائے جاتے ہیں تو اس کے لیے بھاری مقدار میں الیکٹرانک ووٹنگ مشینوں کی ضرورت پڑے گی۔
ون نیشن ون الیکشن: بھارت میں طویل عرصے سے "ایک ملک، ایک الیکشن" (ون نیشن ون الیکشن) کے تصور پر بحث ہوتی رہی ہے۔ اب اس مسئلے پر سنجیدہ غور و خوص شروع ہو چکا ہے اور الیکشن کمیشن (ای سی آئی) نے بھی اس سے جڑی تیاریاں شروع کر دی ہیں۔ حال ہی میں الیکشن کمیشن نے ایک پارلیمانی کمیٹی کو بتایا ہے کہ اگر ملک میں 2029ء میں لوک سبھا اور تمام ریاستوں کی اسمبلی انتخابات ایک ساتھ کرائے جاتے ہیں تو اس سے جڑی لاگت اور لا جِسٹکس کتنے بڑے پیمانے پر ہوں گے۔
5300 کروڑ روپے کی لاگت، لاکھوں نئی مشینوں کی ضرورت
الیکشن کمیشن کے مطابق، ایک ساتھ انتخابات کرانے کے لیے تقریباً 48 لاکھ بیلٹنگ یونٹ (BU)، 35 لاکھ کنٹرول یونٹ (CU) اور 34 لاکھ VVPAT مشینوں کی ضرورت پڑے گی۔ ان مشینوں کی خریداری پر مجموعی طور پر 5300 کروڑ روپے سے زائد کا خرچ متوقع ہے۔ یہ خرچ صرف مشینوں کی خریداری کا ہے، جبکہ لا جِسٹکس، اسٹافنگ، تربیت اور سیکیورٹی پر الگ بجٹ کی ضرورت ہوگی۔
موجودہ وقت میں کمیشن کے پاس تقریباً 30 لاکھ بیلٹنگ یونٹ، 22 لاکھ کنٹرول یونٹ اور 24 لاکھ VVPAT ہیں۔ لیکن ان میں سے بڑی تعداد میں مشینیں 2013-14ء میں خریدی گئی تھیں اور 2029ء تک یہ اپنی اوسط 15 سال کی عمر پوری کرلیں گی۔ اس سے تقریباً 3.5 لاکھ BU اور 1.25 لاکھ CU غیر فعال ہو جائیں گی، جنہیں تبدیل کرنا ضروری ہوگا۔
اس کے علاوہ، الیکشن کمیشن کا خیال ہے کہ 2029ء میں پولنگ اسٹیشنز کی تعداد 2024ء کی نسبت 15 فیصد تک بڑھ سکتی ہے۔ 2024ء میں کل 10.53 لاکھ پولنگ اسٹیشن تھے، اور یہ تعداد 2029ء میں بڑھ کر تقریباً 12.1 لاکھ ہو سکتی ہے۔ ہر پولنگ اسٹیشن پر دو سیٹ EVM کی ضرورت ہوتی ہے، اس کے علاوہ ریزرو اسٹاک کے طور پر بھی 70 فیصد BU، 25 فیصد CU اور 35 فیصد VVPAT علیحدہ رکھے جاتے ہیں۔
مشینوں کی سپلائی اور تکنیکی اپ گریڈ بھی چیلنج
EVM اور VVPAT مشینوں کی سپلائی اپنے آپ میں ایک بڑا چیلنج ہے۔ 2024ء کے لوک سبھا انتخابات کے دوران بھی الیکشن کمیشن کو سیمیکمڈکٹر کی سپلائی میں رکاوٹ کا سامنا کرنا پڑا تھا، جس سے مشینوں کی تیاری متاثر ہوئی۔ اس لیے کمیشن 2029ء کے لیے پہلے سے ہی آرڈر دے کر ان کا اسٹاک تیار رکھنا چاہتا ہے۔
ساتھ ہی کمیشن کو یہ بھی خیال رکھنا ہوگا کہ تکنیکی تبدیلی کے مطابق EVM کو اپ گریڈ کرنا پڑ سکتا ہے۔ فی الحال ملک میں M3 ورژن کی EVM کا استعمال ہو رہا ہے، لیکن مستقبل میں اس کی صلاحیت اور سیکیورٹی کو بڑھانے کی ضرورت ہو سکتی ہے۔
EVM-VVPAT رکھنے کے لیے چاہیے اضافی گودام
ایک ساتھ انتخابات کرانے کے لیے صرف مشینیں ہونا ہی کافی نہیں ہے، انہیں محفوظ طریقے سے رکھنے کے لیے گوداموں کی بھی ضرورت ہوگی۔ فی الحال کئی ریاستوں جیسے آندھرا پردیش، اروناچل پردیش، اڑیسہ اور سکم کے پاس اپنے مستقل گودام نہیں ہیں۔ ایسے میں مرکز کو ان ریاستوں کے لیے گودام تعمیر پر بھی سرمایہ کاری کرنی ہوگی۔
12 لاکھ سے زائد پولنگ اسٹیشنز پر انتخابات کرانے کے لیے ملازمین کی تعیناتی اور تربیت بھی ایک بڑی ذمہ داری ہوگی۔ انتخابی عمل میں شامل ملازمین کو مشینوں کے آپریشن کی مناسب تربیت دینی ہوگی، جس کی شروعات لوک سبھا انتخابات سے چھ ماہ پہلے اور اسمبلی انتخابات سے چار ماہ پہلے کرنی ہوتی ہے۔
اس کے علاوہ، مشینوں کی پہلی جانچ کے لیے مینوفیکچرنگ کمپنیوں کے انجینئرز کو بھی تعینات کرنا ہوتا ہے۔ سیکیورٹی کے لحاظ سے گوداموں اور پولنگ بوتھ کی نگرانی کے لیے مرکزی اور ریاستی فورسز کی بھاری تعیناتی ضروری ہوگی۔
کیا خرچ کم ہوگا؟
پارلیمانی کمیٹی کی جانب سے پوچھا گیا تھا کہ کیا ایک ساتھ انتخابات کرانے سے خرچ میں کمی آئے گی؟ الیکشن کمیشن کا موقف ہے کہ مشینوں کی خریداری پر بھلے ہی ایک مُشت بھاری لاگت آئے، لیکن بار بار انتخابات کرانے کی نسبت لا جِسٹکس اور انتظامی اخراجات طویل عرصے میں کم ہو سکتے ہیں۔ ساتھ ہی یہ بھی دلیل دی گئی کہ اس سے انتخابی عمل زیادہ ہموار، شفاف اور منظم ہو سکتا ہے۔
```
