એસોસિએશન ઓફ મ્યુચ્યુઅલ ફંડ્સ ઇન ઇન્ડિયા (AMFI)ના તાજા આંકડા અનુસાર, ઓગસ્ટ 2026માં ઇક્વિટી ઓરિએન્ટેડ મ્યુચ્યુઅલ ફંડ સ્કીમ્સમાં કુલ ₹29,328.62 કરોડનો નેટ ઇનફ્લો નોંધાયો હતો. જુલાઈમાં આ આંકડો ₹24,697.39 કરોડ હતો. આ રીતે એક મહિનામાં ઇક્વિટી ફંડ્સમાં રોકાણ આશરે 19 ટકા વધ્યું હતું.
જૂન 2026માં ઇક્વિટી મ્યુચ્યુઅલ ફંડ સ્કીમ્સમાં ₹28,973 કરોડનો નેટ ઇનફ્લો નોંધાયો હતો, જે જુલાઈમાં ઘટીને ₹24,697.39 કરોડ રહ્યો હતો. ઓગસ્ટમાં ઇક્વિટી આધારિત સ્કીમ્સમાં નેટ ઇનફ્લો ફરી વધીને ₹29,328.62 કરોડ થયો હતો.
AMFIના આંકડા અનુસાર, ઓગસ્ટ દરમિયાન સિસ્ટમેટિક ઇન્વેસ્ટમેન્ટ પ્લાન (SIP) દ્વારા ₹32,297 કરોડનું રોકાણ થયું હતું. જુલાઈમાં આ આંકડો ₹31,961 કરોડ અને જૂનમાં ₹31,781 કરોડ હતો. જુલાઈની સરખામણીએ ઓગસ્ટમાં SIP યોગદાન આશરે ₹336 કરોડ વધ્યું, જે લગભગ 1.1 ટકાની વૃદ્ધિ છે.
મ્યુચ્યુઅલ ફંડમાં રોકાણ બજારના જોખમને આધીન રહે છે.
ઓગસ્ટમાં સ્મોલ કેપ ફંડ્સમાં ₹7,973.33 કરોડનો નેટ ઇનફ્લો નોંધાયો હતો, જ્યારે જુલાઈમાં આ આંકડો ₹7,767.50 કરોડ હતો. મિડ કેપ ફંડ્સમાં ઓગસ્ટ દરમિયાન ₹6,989.40 કરોડનું રોકાણ આવ્યું હતું, જ્યારે જુલાઈમાં ₹6,192.31 કરોડનો નેટ ઇનફ્લો નોંધાયો હતો.
સ્મોલ કેપ અને મિડ કેપ ફંડ્સને મળીને ઓગસ્ટમાં કુલ ₹14,962.73 કરોડનો નેટ ઇનફ્લો નોંધાયો હતો, જે સમગ્ર ઇક્વિટી ફંડ ઇનફ્લોનો આશરે 51 ટકા છે. ફ્લેક્સી કેપ ફંડ્સમાં ₹5,059.42 કરોડ અને મલ્ટી કેપ ફંડ્સમાં ₹3,732.77 કરોડનો નેટ ઇનફ્લો નોંધાયો હતો.
લાર્જ કેપ ફંડ્સમાંથી ઓગસ્ટમાં ₹1,147.36 કરોડની નેટ ઉપાડ નોંધાઈ હતી. જુલાઈમાં આ કેટેગરીમાંથી ₹1,321.69 કરોડની નેટ ઉપાડ થઈ હતી. આમ, જુલાઈની સરખામણીએ ઓગસ્ટમાં આઉટફ્લો ઓછો રહ્યો હતો.
ELSS ફંડ્સમાંથી પણ ₹1,078.32 કરોડની નેટ ઉપાડ નોંધાઈ હતી. સેક્ટોરલ ફંડ્સમાં ₹53.19 કરોડનો નેટ આઉટફ્લો રહ્યો હતો.
જુલાઈમાં ડેટ ફંડ્સમાં આશરે ₹1.88 લાખ કરોડનો નેટ ઇનફ્લો નોંધાયો હતો. ઓગસ્ટમાં આ કેટેગરીમાંથી ₹8,127.32 કરોડનો નેટ આઉટફ્લો નોંધાયો હતો.
ઓવરનાઇટ ફંડ્સમાંથી ₹30,654.25 કરોડની ઉપાડ થઈ હતી. બીજી તરફ, લિક્વિડ ફંડ્સમાં ₹19,934.29 કરોડ અને મની માર્કેટ ફંડ્સમાં ₹11,734.71 કરોડનું રોકાણ આવ્યું હતું.
