લખનૌ-કાનપુર એક્સપ્રેસવે પર માર્ગ ધસવાની ઘટનાને પગલે ભારતીય રાષ્ટ્રીય રાજમાર્ગ પ્રાધિકરણ (NHAI)એ કડક કાર્યવાહી કરતાં નિર્માણ અને ગુણવત્તા દેખરેખ સાથે સંકળાયેલા ત્રણ અધિકારીઓને પ્રોજેક્ટમાંથી હટાવી તેમને આગામી બે વર્ષ માટે કોઈપણ NHAI પ્રોજેક્ટમાં ભાગ લેતા પ્રતિબંધિત કર્યા છે. પ્રભાવિત ભાગની મરામત પૂર્ણ થયા બાદ એક્સપ્રેસવે પર વાહનવ્યવહાર ફરી સામાન્ય કરવામાં આવ્યો હોવાનું પણ પ્રાધિકરણે જણાવ્યું છે.
લખનૌ-કાનપુર એક્સપ્રેસવેના ઉદ્ઘાટન બાદ થોડા જ દિવસોમાં ઉન્નાવ જિલ્લાના કોરારી વિસ્તારમાં માર્ગનો એક ભાગ ધસી જવાનો વીડિયો સોશિયલ મીડિયા પર સામે આવ્યો હતો. ત્યારબાદ NHAIએ વહીવટી કાર્યવાહી કરતાં નિર્માણ કંપનીના પ્રોજેક્ટ મેનેજર તથા ડેપ્યુટી જનરલ મેનેજર (હાઇવે) વિવેક કુમાર ગુપ્તા, સ્વતંત્ર ઇજનેરના ટીમ લીડર સુરેન્દ્ર કુમાર અને રેસિડેન્ટ ઇજનેર યતેન્દ્ર કુમારને પ્રોજેક્ટમાંથી હટાવી આગામી બે વર્ષ માટે કોઈપણ NHAI પ્રોજેક્ટમાં ભાગ લેતા પ્રતિબંધિત કર્યા છે.
લગભગ ₹4,200 કરોડના ખર્ચે બનેલા આ એક્સપ્રેસવેનું ઉદ્ઘાટન 13 જુલાઈએ કરવામાં આવ્યું હતું.
NHAIના જણાવ્યા મુજબ, 26 જુલાઈએ નિયમિત રૂટ પેટ્રોલિંગ દરમિયાન સંબંધિત સ્થળે માર્ગની સપાટી પર સ્લિપેજ જોવા મળ્યું હતું. માહિતી મળતાં જ પ્રાધિકરણ અને નિર્માણ કંપનીની સંયુક્ત ટીમ સ્થળ પર પહોંચી અને વિગતવાર તકનીકી નિરીક્ષણ કર્યું હતું.
તપાસમાં જાણવા મળ્યું કે સમસ્યા માત્ર પુલના ડેક સ્લેબ ઉપર બનાવેલી બિટુમિનસ સ્તર સુધી મર્યાદિત હતી. અધિકારીઓના જણાવ્યા મુજબ સતત વરસાદ, ભારે વાહનવ્યવહાર અને જોડાણોમાંથી પાણીના રિસાવાના કારણે આવી સ્લિપેજની સ્થિતિ સર્જાઈ શકે છે. નિરીક્ષણ દરમિયાન પુલનો પાયો, સબ-સ્ટ્રક્ચર અને સુપર-સ્ટ્રક્ચર સંપૂર્ણપણે સુરક્ષિત હોવાનું જાણવા મળ્યું હતું. તપાસમાં કોઈપણ પ્રકારનું માળખાકીય નુકસાન અથવા નિર્માણ સંબંધિત ગંભીર ખામી સામે આવી નહોતી.
NHAIએ જણાવ્યું કે નિરીક્ષણ બાદ તરત જ પ્રભાવિત ભાગમાં સુધારણા કાર્ય શરૂ કરવામાં આવ્યું હતું. ક્ષતિગ્રસ્ત બિટુમિનસ સ્તર દૂર કરીને નવી સ્તર પાથરવામાં આવી છે. સાથે જ ભવિષ્યમાં વરસાદી પાણી માર્ગની અંદર પ્રવેશ ન કરે તે માટે જોડાણોની સીલિંગ અને જળનિકાસ વ્યવસ્થામાં પણ જરૂરી સુધારા કરવામાં આવ્યા છે.
પ્રાધિકરણના જણાવ્યા મુજબ તમામ મરામત કાર્ય પૂર્ણ થયા બાદ એક્સપ્રેસવે પર વાહનવ્યવહાર સંપૂર્ણપણે સુરક્ષિત અને સામાન્ય રીતે ચાલુ છે. જોકે, ઘટનાના પગલે ગુણવત્તા નિયંત્રણ અને દેખરેખ વ્યવસ્થા અંગે પ્રશ્નો ઊભા થતાં NHAIએ જવાબદાર અધિકારીઓ સામે કાર્યવાહી કરી છે.
અધિકારીઓએ જણાવ્યું કે ભવિષ્યમાં પણ જો કોઈ પ્રોજેક્ટમાં નિર્માણ ગુણવત્તા અથવા દેખરેખમાં બેદરકારી સામે આવશે તો સંબંધિત અધિકારીઓ અને એજન્સીઓ સામે આવી જ પ્રકારની કડક કાર્યવાહી કરવામાં આવશે.
