चीनच्या तिबेट प्रदेशात गुरुवारी रात्री झालेल्या 7.0 तीव्रतेच्या भूकंपानंतर शनिवारी, 24 ऑक्टोबर रोजी सकाळी सुमारे साडेचार तासांच्या कालावधीत आणखी तीन भूकंपाचे धक्के नोंदवण्यात आले. आतापर्यंत 16 जणांचा मृत्यू झाला असून 76 जण जखमी झाले आहेत. भारत, चीन आणि अफगाणिस्तानमध्येही भूकंपाचे धक्के नोंदवण्यात आले आहेत.
राष्ट्रीय भूकंप विज्ञान केंद्राच्या (NCS) आकडेवारीनुसार, शनिवारी सकाळी भारतीय वेळेनुसार 1 वाजून 8 मिनिटांनी तिबेटमध्ये पहिला धक्का नोंदवण्यात आला. त्याची तीव्रता 4.0 होती आणि भूकंपाचे केंद्र जमिनीखाली सुमारे 15 किलोमीटर खोलीवर होते.
त्यानंतर सकाळी 2 वाजून 7 मिनिटांनी दुसरा धक्का नोंदवण्यात आला. त्याची तीव्रता 4.6 होती. तिसरा धक्का सकाळी 5 वाजून 38 मिनिटांनी नोंदवण्यात आला असून त्याची तीव्रता 4.5 होती. दुसऱ्या आणि तिसऱ्या भूकंपाची खोली 10 किलोमीटर नोंदवण्यात आली.
यापूर्वी गुरुवारी, 22 ऑक्टोबर रोजी रात्री तिबेटमधील नागकू परिसरात 7.0 तीव्रतेचा भूकंप झाला होता. त्यानंतर या भागात सातत्याने लहान धक्के जाणवत आहेत. अमेरिकेच्या भूवैज्ञानिक सर्वेक्षण संस्थेनेही (USGS) मुख्य भूकंपानंतर अनेक परकंपांची नोंद केली आहे.
शनिवारी सकाळी भारतातील तीन ठिकाणीही भूकंपाचे सौम्य धक्के नोंदवण्यात आले. जम्मू-काश्मीरमधील डोडा येथे सकाळी 3 वाजून 11 मिनिटांनी 2.8 तीव्रतेचा भूकंप झाला. त्यानंतर सकाळी 4 वाजून 54 मिनिटांनी किश्तवाड येथे 2.4 तीव्रतेचा धक्का नोंदवण्यात आला.
कर्नाटकातील चिक्कबल्लापूर येथे सकाळी 3 वाजून 29 मिनिटांनी 2.9 तीव्रतेचा भूकंप झाला. या तिन्ही ठिकाणी भूकंपाची खोली सुमारे पाच किलोमीटर होती.
चीनमध्ये सकाळी 4 वाजून 9 मिनिटांनी 4.6 तीव्रतेचा, तर अफगाणिस्तानमध्ये सकाळी 3 वाजून 39 मिनिटांनी 4.0 तीव्रतेचा भूकंप नोंदवण्यात आला. या सर्व धक्क्यांचा तिबेटमधील मुख्य भूकंपाशी थेट संबंध असल्याची पुष्टी झालेली नाही.
गुरुवारी रात्री झालेल्या भूकंपामुळे तिबेटमधील अनेक गावांमध्ये नुकसान झाले आहे. स्थानिक अधिकाऱ्यांच्या माहितीनुसार, आतापर्यंत 16 जणांचा मृत्यू झाला असून जखमींची संख्या 76 झाली आहे. भूकंपामुळे किमान 339 घरे कोसळली किंवा त्यांचे नुकसान झाले आहे.
चीनच्या सरकारी प्रसारक सीसीटीव्हीने प्रसिद्ध केलेल्या छायाचित्रांमध्ये अनेक घरांच्या भिंती तुटलेल्या आणि इमारतींचा ढिगारा रस्त्यांवर पसरलेला दिसत आहे.
नागकू शहरातील बाकेन काउंटीचा सर्वाधिक प्रभावित भागांमध्ये समावेश आहे. या परिसरातील अनेक कुटुंबांना आपली घरे सोडावी लागली आहेत. सतत होणाऱ्या भूकंपाच्या धक्क्यांमुळे आधीच कमकुवत झालेल्या इमारतींचे आणखी नुकसान होण्याची शक्यता प्रशासनाने व्यक्त केली आहे.
चीनची सरकारी वृत्तसंस्था शिन्हुआच्या माहितीनुसार, प्रभावित भागांमधील 12,000 हून अधिक लोकांना बाहेर काढून सुरक्षित ठिकाणी हलवण्यात आले आहे. बचाव मोहिमेसाठी तीन स्थानिक काउंटींमधून 5,000 हून अधिक लोकांना तैनात करण्यात आले आहे.
बचाव पथके गावांमध्ये जाऊन नुकसानग्रस्त घरांची तपासणी करत आहेत. तसेच ढिगाऱ्याखाली अडकलेल्या लोकांचा शोध घेतला जात आहे.
नागकूचे कार्यवाहक महापौर डुनझू यांनी सांगितले की, शुक्रवार दुपारपर्यंत बचाव पथकांनी तीन वेळा शोधमोहीम राबवली होती. या मोहिमेदरम्यान प्रभावित गावांची आणि घरांची तपासणी करण्यात आली.
हा परिसर अधिक उंचीवर असल्यामुळे बचावकार्य करताना अडचणी येत आहेत. थंडी, दुर्गम मार्ग आणि खडक घसरण्याचा धोका यांमुळे बचाव पथकांना आव्हानांचा सामना करावा लागत आहे. घरांमधून बाहेर पडलेल्या नागरिकांसाठी तात्पुरत्या निवाऱ्यांची व्यवस्थाही करण्यात येत आहे.
