‘પુષ્પા 2’ની સફળતા પછી અભિનેતા અલ્લુ અર્જુન ડિરેક્ટર એટલી અને પ્રોડક્શન હાઉસ સન પિક્ચર્સની આગામી મેગાબજેટ ફિલ્મમાં મુખ્ય ભૂમિકામાં જોવા મળવાના છે. ભારતમાં બની રહેલી આ ફિલ્મ પર ‘પુષ્પા 2’ 2024માં રિલીઝ થયા બાદ કામ શરૂ કરવામાં આવ્યું છે. ફિલ્મનું બજેટ 800 કરોડ રૂપિયાથી વધુ હોવાનું જણાવવામાં આવી રહ્યું છે.
ફિલ્મમાં અલ્લુ અર્જુન સાથે દીપિકા પાદુકોણ નજરે પડશે. આ પ્રોજેક્ટમાં અભિનેતા પરંપરાગત ફિક્સ ફી લેવાને બદલે પરસેન્ટેજ મોડલ પર કામ કરી રહ્યા છે. કરાર મુજબ તેઓ ફિલ્મના કુલ બિઝનેસમાંથી અંદાજે 27થી 30 ટકા હિસ્સો ફી તરીકે લેશે. આ મોડલમાં તેમની કમાણી સીધી રીતે ફિલ્મના વ્યવસાય સાથે જોડાયેલી રહેશે અને જોખમ પણ બંને પક્ષો વચ્ચે વહેંચાશે.
રિપોર્ટ્સ અનુસાર આ ડીલમાં થિયેટ્રિકલ અને નોન-થિયેટ્રિકલ બંને રાઇટ્સનો સમાવેશ થાય છે. એટલીની આ ફિલ્મનું બજેટ 800 કરોડ રૂપિયાથી વધુ હોવાના કારણે તેને ભારતીય સિનેમાની સૌથી મોંઘી ફિલ્મોમાં સ્થાન મળે છે.
ફિલ્મમાં દીપિકા પાદુકોણ સિવાય જાન્હવી કપૂર, મૃણાલ ઠાકુર અને રશ્મિકા મંદાના જોડાઈ શકે છે તેવી માહિતી પણ સામે આવી છે, જોકે આ અંગે સત્તાવાર જાહેરાત કરવામાં આવી નથી.
વર્ષ 2024માં રિલીઝ થયેલી ‘પુષ્પા 2’એ અંદાજે 1871 કરોડ રૂપિયાનો બોક્સ ઓફિસ બિઝનેસ કર્યો હતો. ફિલ્મનો બજેટ લગભગ 500 કરોડ રૂપિયા હતો. તે પ્રોજેક્ટમાં પણ અલ્લુ અર્જુને પરસેન્ટેજ મોડલ અપનાવ્યો હતો, જેના આધારે તેમની કમાણી 270થી 300 કરોડ રૂપિયા વચ્ચે હોવાનું જણાવાયું હતું.
આ જ મોડલને કારણે અલ્લુ અર્જુનને હાલ ભારતમાં સૌથી વધુ કમાણી કરનાર અભિનેતા તરીકે ગણવામાં આવે છે. એટલીની આ ફિલ્મમાં પણ એ જ વ્યવસ્થા અપનાવવામાં આવી રહી છે. આ કરાર પર અલ્લુ અર્જુનના નજીકના લોકો અને પ્રોડ્યૂસર બની વસ નજર રાખી રહ્યા હોવાનું જણાવાય છે.
